பதிவுலகம் - சக பதிவர்களின் பார்வையில் - நாள் நான்கு

பாலகணேஷ் - மின்னல்வரிகள்

minnalvarigal.blogspot.com 

பத்திரிகையுலகம் எஸ்.ஏ.பி. சாவி போன்ற திறமையான ஆசிரியர்களின் இழப்பிற்குப் பின் சுறுசுறுப்பாக இயங்கவில்லை என்று கூறப்பட்டாலும் இன்றளவும் வேறுவேறு திறமைகளைக் கொண்டு நன்றாக இயங்கித்தான் வருகிறது. பதிவுலகிலும் அதேபோல் திறமையாக எழுதக்கூடிய பலர் எழுதுவதை நிறுத்திவிட்டிருந்தாலும்கூட... ஃபேஸ்புக், கூகிள் பிளஸ் என்று பல எதிரிகளைச் சந்தித்த போதிலும்கூட... நன்முறையில் இயங்கித்தான் வருகிறது.

பதிவுலகில் இருப்பவர்கள் தனித்தனி குழுக்களை அமைத்துக் கொண்டு செயல்படுகிறார்கள் என்று ஒரு குற்றச்சாட்டு எழுப்பப்படுகிறது சமீபகாலமாய். குழுக்களாக இயங்குவதில் தவறில்லை என்பதே என் கருத்து. ஒரே தலைப்பில் பலர் பதிவெழுதும் தொடர்பதிவு என்றொரு விஷயம் முன்பு இருந்தது. ஒருவர் எழுதி, நான்கு அல்லது ஐந்து பேருக்கு அழைப்பு விடுத்து, அந்த நான்கைந்து பேரும் பிறிதொரு நான்கைந்து பேருக்கு அழைப்பு விடுத்து எனச் சென்ற அந்த சங்கிலித் தொடர் குழுக்களையும் ஒருங்கிணைப்பதை செம்மையாகச் செய்தது. இப்போது யாராவது அழைப்பு விடுத்தாலும், “டைம் இல்ல இப்ப... அப்புறம் கன்டின்யூ பண்றேன்” என்று சொல்லிவிட்டு பின் அதை மறந்து தன் சொந்தப் பகிர்வுகளை மட்டுமே அனைவரும எழுதும் நிலை என்பதால் அந்த சங்கிலித் தொடர் அறுபட்டுப் போய்விட்டது. மாறாக ஆளாளுக்கு தங்கள் தளத்தில் ஏதாவது ஒரு (சிலசமயம் நல்ல, சிலசமயம் அபத்தமான) போட்டியை வைத்து அதில் வெல்பவர்களுக்கு ஒரு (சிறு) பரிசு வழங்கும் கலாசாரம் தலைதூக்கி இருக்கிறது.

ஆக... பதிவுலகம் எப்படி இருந்தது, எப்படி இருக்கும் என்று கவலைப்படுவதை விடுத்து... அவரவர் தனக்குத் தோன்றுவதை அவரவர் தளத்தில் எழுதிச் சென்றாலே போதும் என்கிற நிலைதான் தொடர்வதாக என் எண்ணம். ‘உங்கள் பார்வையில் பதிவுலகம்’ என்ற கேள்வியை ஸ்ரீனிவாசன் எழுப்பியதுமே (யாரது ஸ்ரீனிவாசன்னு கேக்கறீங்களா...? நம்ம ‘காதல் இளரவசன்’ ‘ந்ள்ளிரவு நாயகன்’ சீனு தாங்க...!) அனைவரும் முன்வந்து அவரவர் கோணத்தைச் சொல்வதன் மூலமே பதிவுலகம் இன்னும் உற்சாகம் குன்றாமல் இயங்கி வருகிறது என்பதை உணரமுடிகிறதுதானே...?

*****

அரசன்-கரைசேரா அலை  

karaiseraaalai.blogspot.in

இன்றைய நிலை :

தமிழ்ப் பதிவுலகம் ஒருபோதும் ஒற்றுமையாய் இருந்ததற்கான அறிகுறிகள் ஏதுமில்லை. அதன் விரிசல் என்னவோ அதிகமாகி கொண்டு வருவது போன்ற நிலையை சமீபத்திய அமைதி உணர்த்துகிறது. கடந்த வருடத்திலிருந்து கணக்கிட்டால் புதிய பதிவர்களை விரல் விட்டு எண்ணி சொல்லும் அளவுக்கு மோசமாக இருக்கிறது. பழைய பதிவர்களும் தொடர்ச்சியாக இயங்காமல் தளர்ந்து போனதால் இன்றைய பதிவுலகம் சற்று தடுமாற்றத்தில் இருப்பது வெளிச்சமாகிறது நமக்கு. இப்படி தொடர்வது வருங்காலத்திற்கு நல்லதல்ல!

விரும்பும் மாற்றங்கள்:

1) நண்பர்களுக்கு இணையம் பற்றியும், அதில் எப்படில்லாம் இயங்க முடியும் என்று விளக்கலாம். (எல்லோருக்கும் இது பொருந்தாது ஆர்வம் உள்ள நண்பர்களுக்கு மட்டுமே )

2) நமக்கு நாமே குரல் குடுக்கவில்லை எனில் வேறு எவர் நமக்காக குரல் கொடுப்பார். பதிவு செய்யப்பட்ட சங்கம் மிக அவசியமாய் தேவைப் படுகிறது!

3) சிறு சிறு சந்திப்புகள் நடத்தி, சக பதிவர்கள் பதிவில் செய்யும் தவறுகளை சுட்டி காட்டலாம், (அருமை, அட்டகாசம் போன்ற இன்னபிற மானங்கெட்ட கருத்துக்களை தவிர்ப்பது நலம்) மூத்தப் பதிவர் போன்ற போட்டி மனப்பான்மைகள் குறைய வாய்ப்பு இருக்கும்.

4) வலைத்தளம் தவிர்த்து ஏனைய சமூக தளங்களினால் தான் நசிவு ஏற்பட்டுள்ளது என்பது ஒரு காரணியாக இருந்தாலும் அது மட்டுமே தான் காரணி என்று சொல்ல முடியாது. இயங்கவேண்டும் என்று நினைத்து இயங்கினால் நிச்சயம் எழுச்சி பெறலாம்!

5) நம் கையில் கிடைத்திருக்கும் நல்ல ஒரு மீடியத்தை ஜல்லியடிக்க பயன்படுத்தாமல் வலுவாக, தரமாக பதிவு செய்தாலே போதும் புதியவர்கள் வருவர் என்பது என் நம்பிக்கை.

***** 

தினேஷ்சந்த் - மனதின் ஓசை 

http://imsdsanth.blogspot.in/

தமிழில் வலைப்பூக்கள் ஆரம்பித்து எழுதுபவர்களின் எண்ணிக்கை வருடந்தோறும் அதிகரித்துச் செல்கின்றது.பதிவர்களால் எழுதி வெளியிடப்படும் நூல்களின் எண்ணிக்கை ஆண்டுதோறும் அதிகரித்து செல்கின்றமையும் வலைப்பூக்களில் தம் எழுத்தாற்றலை திறம்பட வெளிப்படுத்தி பத்திரிகைகளில் வேலைவாய்ப்பு பெறும் பதிவர்களின் எண்ணிக்கை தொடர்ந்து அதிகரிப்பதும் தமிழ்ப் பதிவுலகின் வளர்ச்சியையே எடுத்தியம்பி நிற்கின்றன.அத்துடன் ஆண்டுதோறும் நடைபெறும் பதிவர் சந்திப்புகள் பதிவர்களிற்கிடையேயான நட்பு இணையத்தைத் தாண்டி நிஜ வாழ்க்கையிலும் தொடர்வதற்கு வழிவகுக்கின்றன.இத்தகைய பதிவர் சந்திப்புகள் பதிவர்கள் உற்சாகமாக பதிவுலகில் செயற்பட ஊகமருந்தாக அமைகின்றன.

பதிவுலகில் நான் அவதானித்த குறைபாடுகளில் முக்கியமான இரு விடயங்கள் தொடர்பில் இங்கு குறிப்பிட விரும்புகின்றேன்.

முதலாவது கருத்துரைகள் தொடர்பானது.வலைப்பதிவுகளில் இடுகையிடப்படும் கருத்துரைகளில் 99%மானவை அருமை,நன்று,சூப்பர் என்பவையாகவே அமைந்திருக்கின்றன.இதனைத் தாண்டி ஆக்கபூர்வமான விமர்சனங்களை முன்வைக்கும் இயல்பு மிகக்குறைவாகவே காணப்படுகின்றது.அடுத்ததாக அண்மைக்காலத்தில் என்னை அதிகம் கவலைப்படுத்திய விடயம் தமிழ்மண வாக்குகள் இடப்படும் முறை.கருத்துரைகளில் ”அருமை,த.ம 1” என்ற புதிய டிரென்ட் உருவாக்கப்பட்ட பின்பு தரமான இடுகைகள் அதிக வாக்குகளைப் பெறுகின்றனவோ இல்லையோ மேற்கூறிய அமைப்பில் கருத்துரை இடுவோரின் இடுகைகள் அத்தனையும் அதிக வாக்குகளை அள்ளுகின்றன.சில பதிவுகளை வாசிக்கும் போது இதற்கெல்லாம் போய் எட்டு ஒன்பது பேர் வாக்களித்திருக்கிறார்களே என்று எண்ணத்தோன்றும்.அதே நேரம் பிரபலமாகாத ஒரு பதிவர் எழுதிய அருமையான பதிவுகள் கவனிப்பாரற்று கிடக்கும்.பதிவின் தரத்தைப் பற்றிக் கவலைப்படாது நபருக்காக வாக்களிக்கும் தன்மை பதிவுலகிற்கோர் சாபக்கேடு.இந்த நிலை விரைவில் மாறவேண்டும் எனபதே என் அவா. 

பன்னிகுட்டி ராம்சாமி - ஸ்டார்ட் ம்யுசிக்

http://shilppakumar.blogspot.in/ 

பதிவுலகத்தின் பலமே பலவீனமாகிக் கிடக்கிறது. நட்பு வட்டாரமே பலம், ஆனால் அதுவே புதிய வாசகர்களை அன்னியப்படுத்தும். ஓரளவு அனுபவமும், வாசகர் வட்டமும் உள்ள பதிவர்கள் நட்பு ரீதியிலான பாராட்டு கமெண்ட்டுகள் கொடுப்பது, வாங்குவதை, ஓட்டளிப்புகளை தவிர்க்கலாம்.

பிரபுகிருஷ்ணா

karpom.com  

பேஸ்புக்கில் நன்றாக எழுதுபவர்களிடம் வலைப்பூக்களின் முக்கியத்துவத்தை கூற வேண்டும். பேஸ்புக்கில் ஒரு விஷயத்தை பகிர்ந்து விட்டு சில மாதங்கள் கழித்து அதை நாம் தேடினாலும், மற்றவர்கள் தேடினாலும் எளிதில் கிடைக்காது, ஆனால் வலைப்பூக்களில் எப்போது வேண்டுமானாலும் தேடி உடனடியாக பார்க்க, பகிர முடியும். அதே போல பேஸ்புக்கில் நாம் பகிர்வது பெரும்பாலும் நம் நண்பர்கள் மற்றும் அவர்களது நண்பர்களுக்கு மட்டுமே சென்று சேரும். பயனுள்ள பதிவுகளை வலைப்பூக்களில் எழுதுவதன் மூலம் இணையத்தில் எல்லோருக்கும் அது சென்று சேரும், அத்தோடு கூகுள், பிங் போன்ற தேடுபொறிகளில் தேடும் போதும் கிடைக்கும். இதற்கு நாம் இலவசமாக பயன்படுத்தும் பிளாக்கர் வசதியை அவர்களை பயன்படுத்த சொல்லலாம்.

நாளைய பதிவில் 

ஜோதிஜி 

வெங்கட்நாகராஜ் 

தமிழ்வாசி பிரகாஸ் 

இலக்கியசெம்மல் 

தனிமரம் 

இன்றைய வலைசரத்தில் 

கற்றுகொடுக்கும் பதிவர்கள்

  

Tweet