பதிவுலகம் - சக பதிவர்களின் பார்வையில் - நாள் மூன்று

கே.ஆர்.பி.செந்தில்    

http://krpsenthil.blogspot.in/

எழுத்து என்பதை பத்திரிக்கைகள், புத்தகம் என்பதை கடந்து வாசகனையும் எழுத்தாளனாக மாற்றியது இணையம்தான். யாஹூ குழுமத்தில் பிறந்த வாசக எழுத்தாளன் கூகுள் தந்த பதிவுலகம் எனும் அறிய வாய்ப்பை மிகச்சரியாக பயண்படுத்திய காலம் ஒன்று உண்டு. பதிவுலகம் என்பது தான் பார்க்கும், தன்னை பாதிக்கும் அல்லது வியக்க வைக்கும் நிகழ்வுகளை எழுதுவதற்கும் மேலும் மாற்றுக் கருத்துகளின் விவாத களமாக இருந்த காலம் ஒரு பதிவுலக பொற்காலம். அக்காலத்தில்தான் சாரு நிவேதிதா, ஜெயமோகன் போன்ற எழுத்தாளர்களுக்கு இணையாக வாசகர்களும் எழுதிய காலம். முக்கியமான கட்டுரைகள், கதைகள், தொழில்நுட்ப உதவிகள் என எல்லோரிடமும் எல்லாவற்றையும் கொண்டு சேர்க்க துவங்கிய காலம். அதே நேரத்தில் அதற்கு சரி சமமாக நகைச்சுவை தளங்களும், மிகுதியாக கவிதை தளங்களும் கூட போட்டி போட்டன.

இந்த காலகட்டத்தில்தான் கருத்தியல் ரீதியாக நிறைய குழுக்கள் உருவாகி அதன் அடிப்படையில் ஒரு உலகளாவிய நட்பு வட்டங்கள் தோன்றின. இக்காலத்தில்தான் சமூகத்திற்கு பெருமளவில் எழுத்து ரீதியாக தொழில்நுட்ப ரகசியங்களை தமிழுக்கு கொடுத்தனர். மேலும் பதிவர் ஒருவரின் பிரச்சனைகளை முகம் தெரியாத வாசகன் வரைக்கும் ஒன்று சேர்ந்து தீர்த்து வைத்தனர். பெரிய அளவில் நிதி உதவிகள் செய்யப்பட்டன. கருத்து ரீதியாக எதிர் அணியில் இருந்தாலும் நேரில் சந்திக்கும்போது நீண்ட காலம் பழகியவர்களைப் போல மனம் விட்டு பேசிக்கொண்ட நிறைய நண்பர்களை நான் அறிவேன். 

ஆனால் முகநூலும், ட்விட்டரும் வந்தபின் மிகுதியானவர்கள் அதற்கு தாவி விட்டனர். 2006 ஆம் ஆண்டு முகநூல் வருவதற்கு முன்பாக ஆர்குட் ஒன்றுதான் சமூக வலைத்தளமாக இருந்தது, முகநூல் கூட ஆண்ட்ராய்டு தொழில்நுட்பம் வந்த பிறகுதான் சரேலென எல்லோர் கைகளுக்கு வந்தது.

தற்கால பதிவுலகம் என்பது மிகுதியாக வாசிப்பு அனுபவங்கள் இல்லாத நபர்களால் எழுதப்படுவதால் கிட்டதட்ட பதிவுலகம் ஒரு குறிப்பிட்ட குழுவால் அது சார்ந்து இயங்குபவர்கள் மட்டுமே படிப்பது, ஓட்டு போடுவது, கருத்துக்கள் சொல்வது என்று மாறிவிட்டது. இப்போதும் சினிமா விமர்சனம் எழுதும் ஒரு சிலரின் பதிவுகள் மட்டுமே அதிகம் பேரை சென்றடைகிறது.

ஆனாலும் எழுத்தை தொடர்ந்து நேசிக்கும் சிலர் இருக்கவே செய்கிறார்கள். அப்படிப்பட்டவர்களில் ”நிசப்தம்” வா.மணிகண்டன், ”வாரியர்” தேவா, சிறுகதை போட்டிகள் நடத்தும் :வெட்டி பிளாக்கர்ஸ்” சவால் போட்டிகளை நடத்தும் “டெரர் கும்மி”  மற்றும் சமீபத்தில் வெகு சிறப்பாக இயங்கும் “வாசகர் கூடம்”  போன்ற அனைத்தும் பாராட்டுதலுக்கு உரியவை.

பதிவுலகம் இன்னும் சிறப்பாக மாற தமிழ்மணம் போல் அல்லாது ஆங்கிலத்தில் மிக சிறப்பாக இயங்கும் தளமான இண்டி பிளாக்கர் தளம் போல ஒரு சிறப்பான திரட்டியும், புதிதாக எழுத வருகிறவர்களுக்கான ஒரு வழிகாட்டுதலும், அங்கீகாரமும் தேவை. வியாபாரம், பங்கு சந்தை, விவசாயம், மகளிர் மேம்பாடு, உணவு, தொழில்நுட்பம், கல்வி, விளையாட்டு, வேலை வாய்ப்பு இப்படி பல்வேறு துறைகளில் உள்ளவர்கள் துறை சார்ந்த பதிவுகளை எழுத முன்வரவேண்டும் அல்லது அப்படிப்பட்டவர்களை கண்டறிந்து எழுத ஊக்குவிக்க வேண்டும்.

*****

சசிகலா - தென்றல் 

veesuthendral.blogspot.com

பத்திரிகை உலகத்தை தாண்டி பதிவுலகம் விசாலமானது விசித்திரமானது. குறிப்பிட்ட வாசக வட்டத்திற்க்குள்ளேயே சுற்றி வரச்செய்யும் சூழலை உணர முடிகிறது. உறவுகளுக்குள் மொய் விருந்து போல இன்று நாம் உன் பதிவுக்கு வந்தால் தான் நாளை என் பதிவுக்கு வருவார்கள் என்ற நிலை மாற வேண்டும் . நல்ல தரமான கருத்து, சிந்தனை, சொல்லாடல் எங்கிருந்தாலும் எழுதுவது யாராக இருந்தாலும் உற்சாகப்படுத்த வேண்டும். புதியவர் வருகையும் புதிய தேடலும் நம் பார்வையில் இருக்கும் வரை பதிவுகலகம் வளரும் வாழும்.

தென்றல் சசிகலா.

*****

ஹாரிபாட்டர் 

http://ideas.harry2g.com/

பாஸ்ட் ரைட் கலாசாரம் 

முன்பை பார்க்கிலும் மிக அதிகமான விடயங்கள் பதிய படுகின்றன. விமர்சனம் செய்ய படுகின்றன. விவாதிக்க படுகின்றன. ஆலோசனைகள் கூறபடுகின்றன. ஆனால் அது எங்கே நிகழ்கிறது என்று ஆராயும் போது தான் பிளாக்கரை, வேர்ட் பிரஸ்ஸினை வீழ்த்தி பயங்கரமாக பேஸ்புக்கும், டுவிட்டரும் வளர்ந்து வருவது தெரிய வரும்..

பேஸ்புக் என்பது பலரை மிக இலகுவில் சென்றடையும் மீடியா. உடனடி ரிசல்ட் கிடைத்து விடும். பதிவுலகில் சிற்றரசாக இருந்த பலர் பேஸ்புக்கில் தற்போது ராஜாங்கம் நடத்தி வருவதும் அதனால் தான். ஆனால் பதிவுகளுக்கு நீண்ட ஆயுள் இருப்பதில்லை. ஏன் வாரபோக்கில் எழுதியவர் டைம்லைனுக்கே லோட் அடிக்கும். இருந்தாலும் பேஸ்புக்கின் போதை அலாதியானது தான். 

இதை இவ்வண்ணம் ஒப்பிட்டு பார்க்கலாம் என்று நினைக்கிறேன். எப்படி அச்சு ஊடகமும், இணைய எழுத்தும் மோதுகையில் அச்சு ஊடகம் பல வகையில் சுக அனுபவமோ அதே போலவே தான் பாஸ்ட் ரைட் கலாசாரத்தை பதிவுலகோடு ஒப்பிடுகையில் பதிவுலகம் சுக அனுபம் .. 

பதிவுலகு அட்டையில்லா, திறபட்ட டைரி போலானது. பேஸ்புக் எப்படி எமது கட்டுப்பாட்டிற்குள் இருக்காதோ அவ்வளவு தூரம் பிளாக் எமது கட்டுக்குள் இருக்கும். நாலு பேர் தான் வாசித்து இருப்பினும் எமது 2 வருட முற்பட்ட சில எழுத்துக்களை பார்க்கும் போது எமது நினைவுகளின் ஆனந்தம் அலாதியானது. ஏன் இன்று சில பிளாக் பக்கங்களின் பழைய பதிவுகளின் தேதி இலக்கம் கூட பதிவின் தாக்கத்தில் ஞாபகம் வைத்து இருக்கிறேன். குறிப்பிட்டவரின் பிளாகிற்குள் சென்று குறைந்த கிளிக்கிற்குள்ளாய் நான் நினைத்ததை அடைந்து விடுகிறேன். 

இன்னும் தெளிவாக சொல்ல போனால் சில தனிநபர் பிளாக்கிற்கு இருக்கும் கட்ஸ், கெத்து எந்த ஒரு தனி நபர் பேஸ்புக் ப்ரோபைல் பக்கத்திற்கும் இது வரை கிடையாது. வருட கால இடைவெளிகளில் அவை மறைந்து போய் கிடக்கும் அல்லது மறந்து போய் கிடக்கும்

*****

ராம்குமார் - சிவாகசிக்காரன் 

http://www.sivakasikaran.com/

ப்ளாக்ல இப்போலாம் பலரும் சினிமா & சினிமா விமர்சனம் தான் எழுதிட்டு இருக்காங்க...பொதுவான விசயங்களை எழுதுபவர்களும் சரி, வாசிப்பவர்களும் சரி குறைந்து கொண்டே வருகிறார்கள். இதனாலேயே பொதுவா எழுதுற நெறையா பேரு இப்ப எழுதுறதே இல்ல..

சினிமாவைத் தாண்டி எல்லோரையும் எழுத வைக்க ஏதாவது செய்ய வேண்டும்.. அதற்கென்று ஒரு சங்க்ம் ஆரம்பித்து இதைப்பண்ணலாம்.. அதாவது மும்பையில் குறிப்பிட்ட சாலைகளில் குறிப்பிட்ட நேரங்களில் குறிப்பிட்ட வாகனங்களை ஓட்ட அனுமதி இல்லை.. அது போல் நாமும், குறிப்பிட்ட மாதங்களில்/நாட்களில் ஒரு சில விசயங்களை எழுத வேண்டாம் என அந்த சங்கம் மூலம் சொல்லலாம்..

சினிமா விமர்சனம் எழுதுபவர்களிலும் பலருக்கும் விமர்சனம் என்றாலே என்னவென்று தெரியவில்லை.. கதையை முழுதாக எழுதுகிறார்கள்.. அப்புறம், படத்தின் பாடல், இசை, சண்டைக்காட்சி, கேமரா போன்றவற்றை குறிப்பிட்டு முடித்துவிட்டு அதை விமர்சனம் என்கிறார்கள். இதையெல்லாம் படித்தால் அது நல்ல படமாகவே இருந்தாலும் அதன் freshness போய்விடுகிறது.. படம் பார்க்கும் ஆர்வமும் குறைந்துவிடுகிறது.. அதனால் விமர்சனம் எழுதும் ஆட்கள் வெள்ளிக்கிழமையே விமர்சனத்தை எழுதிவிடாமல், அட்லீஸ்ட் திங்களுக்கு பிறகாவது எழுதலாம்... நல்ல படம் என்றாலும் கெட்ட படம் என்றாலும், நாம் விமர்சனம் எழுதாமல் இருப்பதால் அந்த ரெண்டு நாட்களுக்கு ஒரு 100 பேராவது தியேட்டருக்கு போவார்கள்.. நம் புண்ணியத்தில் தியேடர்க்காரன் ஒரு 1000ரூபாய் எக்ஸ்ட்ரா சம்பாதிப்பான்..

வலைசரத்தில் இன்றைய பதிவு

கவனிக்கப்பட வேண்டிய படைப்பாளிகள்

http://blogintamil.blogspot.in/2014/03/seenu-day-3.html

Tweet