பீட்சா - இது முறையான விமர்சனம் அல்ல

" பாப்பா நீ படத்த பாத்து பயப்படலியா பாப்பா"

இண்டர்வெலில் அரங்கிலிருந்து வெளியேறும் பொழுது கட்டிளங்காளை ஒருவன், இருபத்தி ஐந்து வயது நிரம்பிய "அழகிய" பாப்பாவின் கையில் இருந்த ஐந்து வயது பாப்பாவை பார்த்து கேட்ட கேள்வி " பாப்பா நீ படத்த பாத்து பயப்படலியா பாப்பா"  

"எனக்கு இன்னும் டவுட்டாவே இருக்கு, அவன் எந்த பாப்பாவ  பார்த்து இந்தக் கேள்வியக் கேட்டான்" சீனு'ஸ் மைன்ட் வாய்ஸ்.

ஒரு ட்விஸ்ட்டுடன் நிறைவடையும் டைட்டில் கார்டில் இருந்து ஆரம்பமாகிறது இரண்டு மணி நேர ட்விஸ்ட். ரஜினி கமல் அஜித் படங்களுக்கு இருந்த எதிர்ப்பார்ப்பு இந்தப் படத்திலும் என்னை தொற்றிக் கொண்டது காரணம் பதிவுலகமும் பேஸ்புக் உலகமும். எங்கு காணினும் பீட்சா பீட்சா பீட்சா, பீட்சா. எனக்குப் பிடிக்காத ஒரு வஸ்து பீட்சா, "வெண்ணை ரொட்டி" என்பது தான் முறையாகப் பதப் படுத்தப்படாத அந்த ரொட்டியின் தமிழ் பதம் என்று அண்ணன் மெட்ராஸ் அவர்கள் மூலம் அறிந்து கொண்டேன். பரவாயில்லை இந்த பீட்சாவை வெகு சிறப்பாக பதப்படுத்தி நம் இதயத்தை காட்சிக்கு காட்சி பதம் பார்த்திருக்கிறார்கள். 

அரங்கின் உள்ளே நுழையும் பொழுது தற்செயலாக ஊழியர் ஒருவரிடம் கேட்டு வைத்திருந்தேன் எப்போ படம் முடியும் என்று "ரெண்டரைக்கு முடியும்" என்று அவர் சொன்னதால் அடிகடி மணிதுளிகளைப் பார்த்துக் கொண்டே இருந்தேன் எப்போது இரண்டரை மணி ஆகும் என்று. " எனக்கெல்லாம் ட்விஸ்ட்டு பிடிக்காது என்று நினைபவர்கள் கடைசி பத்தாவது நிமிடம் வந்தால் போதும், மொத்த படத்தையும் மீண்டும் ஒருமுறை ரீவைண்ட் செய்கிறார்கள் அப்போது பார்த்துக் கொள்ளுங்கள்.        

கார்த்திக் சுப்புராஜ் பற்றிய கவர் ஸ்டோரி சமீபத்தில் ஆனந்த விகடனில் வெளியாகி இருந்தது, அதில் அதில் என்னைக் கவர்ந்த விஷயம், சினிமாவா  இல்லை ஐ டி வேலையா என்று முடிவெடுக்க வேண்டிய நிலையில் துணிந்து தேர்ந்தெடுத்த துறை தான் சினிமாத் துறை. இவர் இயக்கிய முதல் குறும்படத்திற்கு வந்த கமென்ட் " நீயெல்லாம் எதுக்கு படம் எடுக்குற" இவரது சமீபத்திய குறும்படங்கள் லட்சக்கணக்கான பார்வைகளைத் தாண்டி சென்று கொண்டுள்ளது. இவை எல்லாமே பீட்சா மேல் ஈர்ப்பு வரக் காரணமான விஷயங்கள். 

ரம்யா நம்பீசன் அடுத்த ரவுண்டு வர வேண்டும் என்றால் தன்னிடம் இருப்பதில் ஒரு ரவுண்டை குறைக்க முயல வேண்டும். பின்னணி இசையில் மிரட்டலுடன் இருக்கிறது, வசனம் அருமை. குறைகள் கண்டுபிடிக்க நேரம் தராமல் காட்சி நகர்வுகளில் நேர்த்தி சேர்த்திருப்பது படத்திற்குப் பலம். ஹீரோ ஹீரோயின் காதல் காட்சிகளை பார்க்கும் (சங்கத்து) பேச்சிலர்கள் பொறமை கொள்ளக் கூடாது.      

"தமிழ் சினிமாவையே தலை கீழ புரட்டி போட போறான் மச்சி" படம் முடிந்து வெளியே செல்லும் பொழுது புரட்சிப் போராட்டம் நடத்த ஆரம்பித்தான் தமிழ் சினிமாவின் டெடிகேட் ரசிகன். "த்தா நீயெல்லாம் படம் பாத்திருந்த நெஞ்சு வெடிச்சு செத்ருப்ப" நவநாகரீக இளைஞன் ஒருவன் சென்னைத் தமிழில் தன் நண்பனை சீண்டிக் கொண்டிருந்தான், அவன் கைகளுக்குள் தான் கையை விட்டு மாற்றான் ஆகியிருந்த நவநாகரீக இளைஞிஅவன் இடுப்பை செல்லமாக சீண்ட "த்தா பேசிட்டு இருக்கேன்ல சும்மா வாடி" என்று தேன்பாயும் சென்னை தமிழில் காதல் புரிய அரம்பித்தான். (மேற்கண்ட வாக்கியங்களில் ஓ என்னும் ஒலி சென்சார் செய்யப்பட்டுள்ளது என்பதை பகிரங்கமாக தெரிவித்துக் கொள்கிறேன்). 

அரங்கில் மயான அமைதி நிலவிய நேரம் " எப்பா பயத்துல யாரும் பக்கதுல இருக்கவங்க கைய தடவாதீங்க" என்று ஒருவன் நேரடி வர்ணனை புரிய அதில் எந்தவிதமான இரட்டை அர்த்தமும் இல்லாததால் வெகுவாக ரசித்தேன். திருவான்மியூர் எஸ் டூ திரையரங்கம் காதலர்களாக வந்த பெண்கள் சுடிதாரிலும், அப்பா அம்மாவோடு வந்த பெண்கள் டைட் டீஷர்ட் மற்றும் ஸ்லீவ் லெஸ்ஸிலும் வந்தது குறித்து வியப்பின் எல்லை வரை சென்று வந்தேன் "ஒரு வேள டிரண்டு மாறிடிசோ".    

"தயவு செய்து படத்தின் கதையை யாரிடமும் சொல்லிவிடாதீர்கள், கிளைமாக்ஸ் என்ன என்பதையும் சொல்லி விடாதீர்கள்" இப்படி தான் அதே கண்கள் படத்தின் டைட்டில் கார்டு ஆரம்பமாகும் என்று எனது சித்தப்பா சொன்னார், நேற்று முகபுத்தாக நண்பர் ஒருவர் கூட அடுத்த அதே கண்கள் என்று தான் சொன்னார், என் கெட்ட நேரம் சிறுவயதில் நான் டியூஷன் முடித்து வரும் பொழுது வீட்டில் அதே கண்கள் கிளைமாக்ஸ் தான் ஒட்டிக் கொண்டிருந்தது. எப்படியோ அதில் தவற விட்ட அனுபவத்தை இதில் மீட்டெடுத்து விட்டேன் என்ற ஆனந்தம் உள்ளது.

படம் பார்த்த பின் முகப் புத்தகத்தில் எனது அண்ணன் பதிந்த ஸ்டேடஸ்       

"எல்லோருக்கும் ஒரு மொமென்ட் வரும், அவ நம்பிக்கையநம்பிக்கை யா மாத்துற மொமென்ட்,your moment is waiting".

Ya i got that moment after watching 'PIZZA', A wonderful horror movie of my life time. Just gone to the movie with out any expectation but had very thrilling experience!!!! My best cinema of the year!!

Tweet