தென்காசி - விந்தன்கோட்டையை நோக்கி வரலாற்றுப் பயணம்

இம்முறை தென்காசி சென்றிருந்த பொழுது ஸ்ரீ அண்ணனிடம் "எதாது வித்தியாசமான எடத்துக்கு கூட்டிட்டுப் போங்கண்ணே" என்றேன். இவரிடம் மட்டும் தான் இது போன்ற கேள்விகளைக் கேட்க முடியும். அவரும் சற்றும் யோசிக்காமல் "விந்தன் கோட்டைக்கு போயிட்டு வரலாமா, நாம எல்லாரும் பாக்க வேண்டிய எடம்" என்றார்.      

கோட்டையின் மிச்சங்கள் 

அறுபது ஏக்கருக்கும் மேல் பரந்து விரிந்த பிரமாண்டமான கோட்டை. மண் கொண்டு கட்டப்பட்டது தான் என்றாலும் மிகவும் வலுவான கோட்டை. எதிரிகள் எளிதில் உள்ளே நுழைந்து விடக்கூடாது என்பதற்காக பல அடி ஆழத்திற்கு குளங்கள் வெட்டி நீரால் பாதுகாக்கப்பட்ட கோட்டை, அதனால் இக் கோட்டையை நீராலான கோட்டை என்றும் குறிப்பிடுவர். 

உங்கள் மனமென்னும் காலச் சக்கரத்தை சுமார் அறுநூறு ஆண்டுகளுக்கு முன் அதாவது 15ம் நூற்றாண்டுக்கு சுழற்றி, மேற்கூறிய வரிகளை உங்கள் கற்பனையின் காட்சியாக்குங்கள், தென்காசியை தலைநகராகக் கொண்டு ஆட்சி புரிந்த சடையவர்மன் பாராக்கிரமப் பாண்டியன் எழுப்பிய விந்தன்கோட்டை உங்கள் கண்முன் தோன்றும். 

குதிரைக்கு தண்ணீர்  வைக்கும் கல் 

மதுரையை நாயக்கர்களும், முகலாயர்களும் கைப்பற்றிய பின்னர் அங்கிருந்த பாண்டிய மன்னர்கள் தென் மாவட்டங்களை நோக்கி நகர்ந்து, அங்கே பல குறும்பகுதிகளை தங்கள் வசப்படுத்தி அவற்றை ஆளத் தொடங்கினர். 

இவ்வாறாக சடையவர்மன் பாராக்கிரமப் பாண்டியன் மற்றும் அவன் வழி வந்தவர்கள் தென்காசியை தலைநகராகக் கொண்டு தென்காசி மற்றும் அதன் சுற்றுப்புறப் பகுதிகளை ஆளத் தொடங்கினர். மேலும் இவர்கள் தென்காசிப் பாண்டியர்கள் என்றறியப் படுகின்றனர். தென்காசிப் பாண்டியர்களுள் முதன்மையானவன் சடையவர்மன் பாராக்கிரமப் பாண்டியன், அவனுக்கு விந்தன் என்றொரு பெயரும் உண்டு, எனவே விந்தன் எழுப்பிய கோட்டை விந்தன்கோட்டை என்றழைக்கப் படுகிறது. தென்காசிக்கு மொத்தம் பதினாறு பெயர்கள் அவற்றில் விந்தன் கோட்டை என்ற பெயரும் அடங்கும்.

இது போன்ற பல விசயங்களை வெகு சமீபத்தில் அறிந்திருந்ததால் விந்தன் கோட்டை செல்ல வேண்டிய ஆர்வம் இன்னும் அதிகமாகியது. ஸ்ரீ அண்ணன், ஜெய் கணேஷ் அண்ணன் மற்றும் இவர்களின் வழிகாட்டியும் குருவுமான செண்பகராமன் (செம்பா ப்பா), இந்த மூவரும் வழிகாட்ட ஏழு பேர் அடங்கிய குழு விந்தன் கோட்டை நோக்கி பயணிக்கத் தொடங்கியது. எங்களுடன் தென்காசிக்கே சொந்தமான தூறல் மழையும் சேர்ந்து பயணிக்கத் தொடங்கியது. 

நீராலான கோட்டைக்கான ஆதாரம் 

தென்காசியில் இருந்து 15 கி.மீ தொலைவில் ஆய்க்குடி கடந்து சாம்பவர் வடகரை செல்லும் வழியில் உள்ளது விந்தன் கோட்டை. முழுக்க முழுக்க வயலும் வயல் சார்ந்த இடங்களாலும் சூழப்பட்ட இடம். கண்ணுக்கு எட்டிய தூரம் வரை வயல்வெளி பரந்து விரிந்த இடங்களில் எல்லாம் தற்போது காற்றாலைகள் சாவகாசமாக மின்சாரத்தை உறிஞ்சிக் கொண்டுள்ளன.  

அழகிய மணவாளப் பெருமாள் கோவில் 

விந்தன் கோட்டையை அடைந்ததும் நாங்கள் முதலில் தரிசித்த இடம் அழகிய மணவாளப் பெருமாள் கோவில். கோட்டையின் உள்ளேயே அமையப் பெற்றுள்ள இக்கோவில் திருவிதாங்கூர் சமஸ்தானத்தை சேர்ந்த அரச குடும்பத்தவர்களுக்கு சொந்தமான குலதெய்வக் கோவில் என்று குறிப்பிடுகின்றனர். வெகு சமீபத்தில் தான் இக்கோவிலின் கும்பாபிஷேகம் நடந்து முடிந்துள்ளது. கும்பாபிஷேகத்திற்கு சமஸ்தானத்தை சேர்ந்தவர்களுக்கும் அழைப்பு விடுக்கப்பட்டதாக கோவில் நிர்வாகி கூறினார்.

இதற்கு முன் பிரம்மாண்டமான கோட்டை இருந்த இடங்களில் எல்லாம் அதன் எச்சங்களைக் கூட காண முடியவில்லை. எச்சங்களின் எச்சங்கள் மட்டுமே எங்களை வரவேற்றன.

பல அடி உயரத்திற்கு எழுப்பப்பட்ட கோட்டையின் சுவர்கள் அத்தனையும் அழிந்து கோட்டையின் அடித்தளம் மட்டும் எஞ்சி நிற்கிறது. கோட்டை மற்றும் கோட்டை சார்ந்த இடங்களில் இருந்த கற்கள் அனைத்தையும் இந்தப்பகுதி மக்கள் வீடு கட்டுவதற்காக பெயர்த்து எடுத்துவிட்டனர். மிச்சமிருக்கும் கோட்டையின் கற்கள் கோவிலின் முன்பகுதியில் வளர்ந்திருக்கும் புதர்களுக்கு அடியில் இளைப்பாறிக் கொண்டுள்ளன.

குதிரை லாயம் 

கோவிலின் பின்புறம் சிதிலமடைந்த நிலையில் பராக்கிரமப் பாண்டியனின் குதிரை லாயம் உள்ளது. லாயம் புதர் மண்டிக் காணப்படுகிறது, இந்த புதர்களுக்கு மத்தியில் குதிரைகள் கட்டுவதற்கான தூண்களும், தண்ணீர் வைப்பதற்கான தொட்டியும் உள்ளது. குதிரை லாயத்தின் பின்புறம் பாழடைந்த நிலையில் கிணறு உள்ளது. இதனை அரண்மனையின் அந்தபுரத்துக் கிணறு என்று சொல்கிறார்கள். மிகவும் பாசிபடிந்த நிலையில் உபயோகிக்கவே முடியா நீருடன் பரிதபமாய் இருக்கிறது இப்பாழுங்கிணறு.  

பாழுங்கிணறு 

கோட்டைச் சுவர் வழியாக சிறிது தூரம் நடந்து சென்றால் சிதைக்கப்பட்ட நிலையில் சமாதி போன்ற ஒரு அமைப்பு உள்ளது. இதனை பாராக்கிரமப் பாண்டியனின் சமாதி என்று சிலரும், அவரின் பொக்கிஷ அறை என்று சிலரும் நம்புகின்றனர். அவ்விடம் பொக்கிஷ அறை என்று நம்பப்படுவதால் அந்த இடத்தை தகர்த்து பொக்கிசங்களை எடுக்க பலரும் முற்பட்டுள்ளதாகவும், அவ்வாறு தகர்க்க முயல்பர்களை ஏதோ ஒரு சக்தி தடுத்து நிறுத்துவதாகவும் கூறுகின்றனர். மேலும் ஆய்க்குடியில் மகாலிங்க மலை என்னும் ஒரு சித்தர் மலை உள்ளது. பாண்டிய மன்னனின் சமாதியும், மகாலிங்க மழையும் ஒரே நேர்கோட்டில் உள்ளதால், இது பராகிரமப் பாண்டியனின் சமாதியாக இருபதற்கு வாய்புகள் அதிகம் என்று கூறுகின்றனர்.

பராக்கிரமப் பாண்டியனின் பொக்கிஷ அறை / சமாதி அறை 

விந்தன்கோட்டையில் இருந்து தென்காசிப் பெரிய கோவிலான காசி விஸ்வநாதர் கோவிலுக்கு செல்வதற்காக சில இடங்களில் சுரங்கப் பாதைகள் இருந்துள்ளது. தற்போது அந்த இடங்களில் சுரங்கம் இருந்ததற்கான தடங்களை மட்டுமே நம்மால் காண முடிகிறது. 

கோட்டையின் வெளிப்புறம் மூன்று அடி உயரம் கொண்ட நடுகல் ஒன்று நட்டு வைக்கப்பட்டுள்ளது. நடுகல்லின் மத்தியில் வீரன் ஒருவன் போர்வாளை உயர்த்திப் பிடித்துக் கொண்டு போர்க்களம் நோக்கி ஓடுவது போன்ற சிற்பம் பொறிக்கப்பட்டுள்ளது. போரில் வீர மரணம் அடையும் வீரர்களின் நினைவாக நடுகற்கள் கோட்டை வாயிலில் வைக்கப்படுவது மரபு. அதனால் இந்த நடுகல் இருக்கும் இந்த இடத்தில தான் அன்றைய கோட்டைக்கான வாயிலும் இருந்திருக்க வேண்டும். கோட்டைக்கு இரண்டு வாயில், மற்றொரு வாயிலிலும் நடுகல் நட்டு வைக்கப்பட்டுள்ளது. 

கோட்டையை சுற்றிலும் வற்றிப்போன குளங்களைக் காண முடிகிறது. விந்தன் கோட்டையை நீராலான கோட்டை என்று குறிப்பிடுவதற்கான சாட்சிகள் இந்த வற்றிப் போன குளங்கள் மட்டுமே.

பராக்கிரமப் பாண்டியனின் குல தெய்வமான வீர கண்டியம்மனின் கோவில் கோட்டைக்கு வெகு அருகில் உள்ளது. போருக்கு செல்வது முதல் எந்த ஒரு முக்கியமான முடிவு எடுப்பதுமாய் இருந்தாலும் வீர கண்டியம்மனிடம் ஆசி பெற்று செய்வதுதான் பாண்டிய மன்னர்களின் வழக்கமாக இருந்துள்ளது. வேப்ப மரங்கள் சூழ வீர கண்டியம்மன் வீற்றுள்ளார். நாங்கள் சென்ற நேரம் கோவிலன் நடை சாத்தபட்டிருந்தது. கோவிலின் கதவில் இருந்த ஜன்னல் வழியாக அம்மனை தரிசிக்கும் பாக்கியம் பெற்றோம். கோவிலன் உள்ளே கும்மிருட்டு. அந்த இருட்டுக்கு கண்கள் பழகி அம்மன் காட்சியளித்த அந்த நொடியை சற்றே ரம்மியமானதாய் உணர்ந்தோம்.      

கோட்டையின் அடித்தளம் 

வீர கண்டியம்மனுக்குப் பின்னால் சிறிது தொலைவில் வீற்றிருப்பவர் விந்தன் கோட்டையின் காவல் தெய்வமான கோட்டை கருப்பசாமி. இவர் மிகவும் உக்கிரமான சாமி என்பதால் அவரின் அருகில் சென்று வழிபட அவ்வூர் மக்கள் எங்களை அனுமதிக்க வில்லை. அதனால் சில மீட்டர் தொலைவில் நின்றே தரிசித்தோம். பத்தடி உயரத்திற்கு மண் கொண்டு எழுப்பட்ட இந்த கோட்டை கருப்பசாமி விந்தன் கோட்டையை தீய சக்திகள் எதுவும் நெருங்கிவிடா வண்ணம் காத்து வருகிறார் என்று இவ்வூர் மக்கள் கூறுகிறார்கள்.

தென்காசியின் வரலாறை சுமந்து நிற்கும் விந்தன் கோட்டை பற்றி தென்காசியைச் சேர்ந்த மண்ணின் மைந்தர்கள் பலருக்கும் தெரியாது. நம்மை ஆண்ட மன்னர்கள் குறித்து நாம் அறிந்து கொள்ள வேண்டிய விஷயங்கள் இவை. பராகிரமப் பாண்டியன் கட்டிய தென்காசி பெரிய கோவில் பாண்டியர்களின் கட்டிட மற்றும் சிற்ப கலைக்கு சான்றான ஒன்று. இன்றைய நிலையில் அக்கோவில் ஒன்று தான் அவனது புகழை கம்பீரமாக பறை சாற்றிக் கொண்டுள்ளது. 

வரலாற்றின் மிக முக்கியமான ஆதாரத்தை, நினைவுச் சின்னங்களை பாதுகாக்க அரசாங்கமும், எம்மக்களும் தவறி விட்டனர் என்பதை நினைக்கும் பொழுது சற்றே வருத்தமாய் உள்ளது. எஞ்சிய பகுதிகளையாவது பாதுகாக்க வேண்டும் என்பதே எம்போன்றோரின் அவா! 

வாய்ப்பு கிடைத்தால் நிச்சயம் சென்று வாருங்கள். தென்காசியில் இருந்து பேருந்து வசதி எதுவும் இல்லை.ஆட்டோ மற்றும் காரில் செல்லும் அளவுக்கு வழி உள்ளது.   

Tweet