விஸ்வரூபம் ஏரோ-த்ரீ-டி அனுபவம்

தடைகளை வென்றே சரித்திரம் படைத்தவன் நியாபகம் வருகிறதா...

முதலில் கமலஹாசனிடம் ஒரே ஒரு கேள்வியுடன் இந்தப் பதிவை ஆரம்பிக்கிறேன் 

 ஹல்லோ மிஸ்டர் கமல் இவ்வளவு திறமைய இத்தனை நாள் எங்க ஒளிச்சி வச்சிருந்தீங்க? 

சமீப காலமாய் எங்கெங்கு காணினும் விஸ்வரூபம் தான். ஜனவரிஇருபத்தி நான்காம் தேதி மிக ஆவலாய் இருந்தேன், இரவு நெருங்க நெருங்க தடை விலகுமா விலகாதா என்பதே கேள்விக்குறியாய் இருந்தது. படம் வெளியாகவில்லை தடை ஒரு வார காலத்திற்கு நீட்டிப்பு என்று கேள்விபட்டதும் ஆங்கிலத்தில் FRUSTRATION என்று சொல்வார்களே அப்படித் தான் இருந்தது எனக்கு. 

சென்றமுறை டிக்கெட் புக் செய்யும் பொழுது மாயாஜாலில் ஏரோ த்ரீ-டி சவுண்ட் சிஸ்டம் உள்ளது என்பதை அறிந்து கொண்டேன். தடைகளைத் தாண்டி வரும் பொழுது மாயாஜாலில் படம் பார்ப்பது என்ற முடிவுக்கும் வந்துவிட்டேன். இரவு நேரப் பணிக்கு கிளம்பிய மிகச் சரியான நேரத்தில் மாயாஜாலில் டிக்கெட் புக்கிங் ஓபன் ஆகி இருந்தது, சகோதர சகோதரிகளிடம் சொல்லி புக் செய்ய சொன்னால் திரைக்கு மிக மிக அருகில் இருக்கும் முதல் வரிசையை புக் செய்தார்கள் ( அதையாவது செய்தார்களே என்று சந்தோசப் படுவதைத் தவிர வேறு வ(ழி)லி இல்லை.  

உலக அளவில் ரெட் டெயில்ஸ் என்னும் ஒரே ஒரு திரைப்படம் மட்டும் ஏரோ-த்ரீ-டி தொழில் நுட்பத்தில் வந்துள்ளது, விஸ்வரூபம் உலக அளவில் இரண்டாவது மேலும் ஆசிய அளவில் முதல் திரைப்படம். பீட்ஸா படம் பார்க்கும் பொழுது இடையே ட்ரைலெர் ஒளிபரப்பப்பட்ட பொழுதே ஒலிபதிவு மிகவும் பிடித்துப் போய்விட்டது. படம் பார்த்த பலரும் " மொக்க தியேட்டர்ல கூட சவுண்ட் சூப்பரா இருக்கு" என்று எழுதி இருந்தது எதிர்பார்ப்பை இன்னும் அதிகப்படுத்தி இருந்தது. 

உடன் வேலை பார்க்கும்  ஆந்திர மாநிலத்து நண்பர்கள் ஆந்திராவில் படம் பார்த்துவிட்டு வந்து ஆகோ ஓகோ என்று சொல்லிக் கொண்டிருந்தனர். அதுவேறு கடுப்பையும் எதிர்பார்ப்பையும் அத்துமீறி கிளப்பிக் கொண்டிருந்தது. ஒருவழியாய் தடைகளை வென்றே சரித்திரம் படைக்க வந்து சரித்திரமும் படைத்துவிட்டது என்றே சொல்லலாம். 

விஸ்வரூபம் ஏரோ த்ரீ- டி யில் 

சென்னைக்கு வந்த ஐந்து வருடங்களில் அத்தனை திரையரங்கிற்கும் சென்று விட்டேன் மாயாஜாலைத் தவிர இன்று அதுவும் நிறைவேறியது. அரங்கின் முதல் மூன்று இருக்கை. இருநூறு பேர் மட்டுமே அமர்ந்து படம் பார்க்கக் கூடிய மிக சிறிய திரையரங்கு. 

கமலஹாசனின் அறிமுக நடனத்துடன் தொடங்கியது விஸ்வரூபம். சலங்கை ஒலி ஏரோ த்ரீ டியில் மிக துல்லியமாக இருந்தது. சலங்கையின் சரடைக் கழற்றும் பொழுது தரையில் உரசும் ஒலி கூட மிகத் துல்லியமாக இருக்கிறது. சில முக்கியமான இடங்களில் மற்றும் சிறப்பு சப்தங்களில் மட்டுமே ஏரோ த்ரீடி பயன்படுத்தப் பட்டுள்ளது என்று நினைக்கிறன். சண்டைக் காட்சிகளில் அரங்கம் இல்லை இருக்கைகள் கூட அதிருகிறது.

வழக்கமான தமிழ் சினிமாவிற்கு தேவையான அத்தனை மசாலாவும் இருக்கிறது இந்தப் படத்தில். தமிழ் சினிமா ஏன் இந்திய சினிமாவே இதுவரை பார்த்திராத கதைக் களத்தில் வெகு அற்புதமாக தேவையான மசாலாக்களை மிக நேர்த்தியாக ஆங்காங்கு தூவி, தெவிட்டாத அற்புதமான பதார்த்தத்தை கொடுத்துள்ளார் உலக நாயகன். 

"உன்னைக் காணாது நான் இன்று நானில்லையே" பாடலுக்கு கமலின் அபிநயம், அரங்கில் இருந்த எங்களுக்கு அப்படி ஆடத் தெரியாது என்பதால் கமலின் நடனத்தை ரசித்துக் கொண்டிருந்தோம். சில பாடல்கள் பெரிய பாடலாக இருக்கிறதே என்று சலிப்படைந்ததுண்டு, இந்தப் பாடல் இன்னும் கொஞ்சம் நீளக் கூடாதா என்று எண்ண வைத்த முதல் பாடல். 

உலகுண்ட பெரு வாய்யன் எந்தன் வாயோடு வாய் பதித்தான்

இங்கு பூலோகம் என்று பொருள் உள்ளதை 
இந்த பூங்கோதை மறந்தாளடி

கமலைப் பின்தொடரும் டிடெக்டிவ் ஆசாமியிடம் இருந்து திரைக்கதை கதைக்குள் வேகமாக நகரத் தொடங்குகிறது. தீவிரவாதிகளிடம் மாட்டிக்கொண்டு அடிவாங்கும் நடனக் கலைஞன் கமல், குரான் ஓதியபடி வெளுத்து வாங்கத் தொடங்கும் சண்டைக்காட்சி அப்பப்பா அந்த சண்டைக் காட்சியில் எவ்வளவு உற்சாகம் அவரிடம். தொழில்நுட்ப உதவியுடன் படமாக்கப்பட்டிருக்கும் அந்த சண்டைக் காட்சி சிம்ப்ளி சூப்பர். 

ஆப்கானிஸ்தான் தலிபான்களை அப்படியே கண்முன் நிறுத்தியிருக்கிறார். தாலிபான்களை காண்பிக்கும் அந்தக் கட்சிகள் ஒரு டாக்குமென்ட்ரி போல் நகர்ந்தாலும் கதை ஓட்டத்திற்கு அவசியமாகிறது. நாம் எல்லாம் நடை உடை பாவனையில் கையை காலை சுழற்றி கிரிக்கெட் விளையாடுவோம் தாலிபன்கள் கோட்டையில் சைகைகளால் சுட்டு சுட்டு விளையாடுகிறார்கள். நிஜத்திலோ விளையாட்டு வினையாகிறது. என்ன செய்வது? 

அல்கொய்தா தீவிரவாதிகளுக்கு பயிற்சி கொடுக்கும் தீவிரவாதியாக கமல் கனகச்சிதமாகப் பொருந்திப் போகிறார். படத்தில் அரபியும் ஆங்கிலமும் ஆக்கிரமிப்பிதிருப்பதைப் பார்க்கும் பொழுது இதை ஹாலிவுட் படமாகவே எடுத்திருக்கலாம். மேலும் படம் முழுக்க முழுக்க ஆப்கனிலும் அமெரிக்காவிலும் மட்டுமே நகர்கிறது. செட் போட்டு தான் எடுத்துள்ளார்கள் என்றாலும் உண்மைக்கு மிக அருகில் இருக்கிறது கலை. 

ஆப்கனில் நடைபெறும் சண்டையின் பொழுது தவறுதலாக அப்பாவியைக் சுட்டு வருந்தும் ஒரு அமெரிக்கன், கூட்டம் கூட்டமாக இருக்கும் குடும்பங்கள் மீது கொலைவெறி தாக்குதல் நடத்தும் அமெரிக்கன் என்று அமெரிக்கப் படையின் முரண்பட்ட முகத்தை அற்புதமாகக் காட்டியிருப்பார். அமெரிக்க தாக்குதலில் அடிபடும் அப்பாவி மக்களைப் பார்க்கும் பொழுது அமெரிக்கா மீதோ தலிபான்கள் மீதோ கோபம் வரவில்லை மனிதம் இழந்த மனித மிருகங்களின் மீது தான் கோபம் வருகிறது.

இத்தனை வருட அனுபவத்தையும், உழைப்பையும் மொத்தமாகக் கொட்டி உலகத்தரத்தில் ஒருபடம் எடுத்து அதில் வெற்றியும் கண்டுள்ளார். சண்டைக் காட்சிகள் பெரும் பொருட்செலவில் எடுக்கப்பட்டுள்ளது, இந்தப் படம் மட்டும் முடக்கப்பட்டிருந்தால் படத்தோடு சேர்ந்து கமலும் முடங்கிப் போயிருப்பார்.  

சில காட்சிகளில் சில உயிர்கள் பலியாகும் பொழுது கமல் மிக வருந்துவார் இது என்னைப் பொருத்தவரை லாஜிக் மிஸ்டேக் போல் தோன்றியது, காரணத்தை படம் பார்த்து தெரிந்து கொள்ளுங்கள்.  

வசனங்கள் அருமை. பெரும்பாலான வசனங்கள் கமல் தான் எழுதி இருப்பார் என்று நினைக்கிறேன். ரசித்து சிரிக்க வைக்கின்றன. அது தான் கமல் டச். கமல் படம், என்றுதான் முதல் முறை பார்த்தவுடன் புரிந்துள்ளது. இதில் சில டெக்னிகல் வார்த்தைகளை கூறுகிறார்கள், அதை சாமான்யனுக்கும் புரியும்படி எடுக்காதது குறையே.     

ஷங்கர் - இஷான் - லாய் மூவரும் பின்னணியில் பின்னி எடுத்துள்ளார்கள். கத்திரி கனகச்சிதம். ஒலி/ஒளிப்பதிவு அபாரம். பூஜா குமாரை விட ஆண்ட்ரியா என்னை கவர்ந்துவிட்டார். அட சில காட்சிகளுக்கு ஒசாமா பின்லேடனும் வந்து செல்கிறார்.   

கிளைமேக்சில் கமல் தொழுகை செய்வார். ஆனால் அதற்கு முந்தைய கட்சியில் 'கடவுள் தான் காப்பாத்தணும்' என்று ஒரு வசனம் வரும் பொழுது, 'கடவுள். எந்த கடவுள் காப்பாத்துவாரு' என்று தனது நாத்திகத்தையும் வலிந்து திணித்துள்ளார். கமல், நீங்களே உங்களைப் பற்றி சொல்லும் அந்த வசனம் மிகச் சரி யு ஆர் தி ஹீரோ யு ஆர் தி வில்லன்.        

தீவிரவாதிகளிடம் இருந்து அமெரிக்காவை காப்பாற்றியாகி விட்டது இந்தியாவைக் காப்பாற்ற வேண்டாமா 'எவன் என்று நினைத்தாய் எதைக் கண்டு சிரித்தாய்' என்று இந்தியாவை காப்பாற்ற இரண்டாம் பாகத்தில் வருகிறார் உலக நாயகன்.    

இந்தப் படத்தை எத்தனை முறை அரங்கில் பார்ப்பேன் என்று என்று தெரியாது. நிச்சயமாக திரை அரங்கில் பார்க்க வேண்டிய படம். சென்னையில் இருந்தால் சத்யமிலோ அல்லது மாயாஜாலிலோ பாருங்கள்.  

Tweet