இந்து ஒருங்கிணைப்பு - விழலுக்கு இரைத்த நீர்?

வணக்கம் அண்ணா,   

உங்கள் பதிவை படித்தேன். உங்கள் கருத்துகளுடன் நான் உடன்படுகிறேன் என்றாலும் என்னுடைய பார்வை...

சமீபகாலங்களில் சமூக வலைதளங்களில் நான் கண்டவை மூலம் கூறுகிறேன்.  

சமீபகாலமாக சில குழுமங்களாக செயல்படும் இந்துக்கள் இஸ்லாமியர்களை தரக்குறைவாக தாக்குவதும், அதேபோல் இஸ்லாமியர்கள் இந்துக்களை தாக்குவதும் தொடர்கிறது என்பதைவிட அதிகரித்துள்ளது என்பதே உண்மை. பகடி என்ற நிலையையும் தாண்டிய மிக மோசமான நிலைக்கு தள்ளப்பட்டுள்ளது. ஒருவேளை இதைத் தடுத்து நிறுத்த வேண்டும் என்று நினைத்தால் அதற்கு ஒரேவழி சமூகவலை தளங்களை தடை செய்வதுதான், காரணம் மதங்களை தடைசெய்ய இயலாது என்பது ஜீரணிக்க முடியா உண்மை. அதேநேரம் பேஸ்புக்கையும் தடைசெய்ய முடியாது ஏனென்றால் அது மார்க்கின் தொழில்.

எனக்கு கடவுள் நம்பிக்கை உண்டு அதனால் என் மதம் கூறும் கோட்பாடுகளை ஏற்றுக்கொள்கிறேன் என்பது என் நம்பிக்கை. ஆனால் இங்கே பிரச்சனையானது என் நம்பிக்கை மட்டுமே சிறந்தது உயர்ந்தது மற்றெல்லாம் பற்றி கவலையில்லை என்றால் கூட பரவாயில்லை அவையெல்லாம் பொய் என எவன் ஒருவன் பேசத் தொடங்குகிறானோ அவனிடம் இருந்தே பிரச்சனை தொடங்குகிறது. தற்போதைய நிலையில் பிள்ளையை யார் கிள்ளியது என்பதையும் தாண்டி பிள்ளையை யார் இன்னும் அதிகமாய் கிள்ளுவது என்ற போட்டிக்கு தள்ளியிருக்கிறது இன்றைய சமூக வலைதள கலாச்சாரம். பரிதாபம் தொட்டிலை ஆட்டத்தான் யாரும் இல்லை. அல்லது தொட்டிலை ஆட்ட வேண்டியவர்களும் ஏதாவது ஒரு பக்கத்திற்கு தூபம் வளர்த்து திரியை தூண்டிவிடுகிறார்கள், இதில் முக்கியமானவர்கள் சோ கால்ட் செக்குலரிஸ்ட். 

மேலும் அரசியல்வாதிகள் அனைவரும் ஒட்டுமொத்த இந்துக்களையும் இஸ்லாமியர்களுக்கு எதிரியாய் மாற்றுகின்றனர் என்கிறீர்கள். அப்படியெல்லாம் இந்துக்களை அவ்வளவு எளிதில் மாற்றிவிட முடியாது. காரணம் இன்றளவிலும் அஸ்ஸாலாமு அலைக்கும் என்றால் ஜெய்ஸ்ரீராம் என்றோ பாரத்மாதாகிஜே என்றோ யாரும் கூறவில்லை அலைக்கும் சலாம்தான். 

இந்துக்களை ஒரே குடையின் கீழ் கொண்டு வருவது அவ்வளவு எளிதில்லை. அவர்களை பல காரணிகள் தடுக்கிறது. அதில் ஒன்று ஜாதி என்றால் மற்றொன்று சகோதரத்துவம். அதேநேரம் திருப்பதியிலும் மற்ற கோவில்களிலும் கூடும் கூட்டமெல்லாம் RSSகாரர்கள் என்றால் இந்நேரம் பாஜக தான் ஆட்சியில் இருக்க வேண்டும். அல்லது இஸ்லாமிய துவேசத்தை இந்துக்கள் மனதில் அரசியல்வாதிகள் ஏற்றிவிட்டார்கள் என்பது உண்மை என்றால் பாபர் மசூதி சம்பவத்திற்கு பின் பாஜக மட்டுமே ஆட்சியில் இருந்திருக்க முடியும். மேலும் அப்படி அரசியல்வாதிகளே செய்ய நினைத்தாலும் அதில் அவர்கள் வெற்றி பெறமாட்டார்கள். 

உங்களுக்கே தெரியும் இந்துக்கள் ஓரிடத்தில் குழுமுகிறார்கள் என்றால் அது கோவில் திருவிழா அல்லது நல்லது கெட்டது அன்றி வேறெங்கும் இல்லை. ஒருவேளை பேஸ்புக்கை கைகாட்டினால் மதத்துவேசத்தை பரப்பும் எத்தனை ஒரிஜினல் ஐடியை உங்களால் காட்டமுடியும். மிஞ்சிப்போனால் சிலஆயிரம் பலலட்சம் பேர் இதையெல்லாம் கண்டுகொள்வதே இல்லை. இந்த சில ஆயிரம் பேர்களை கண்டுகொள்ளாமல் விட்டாலே போதும் மதத்தையும் மூட வேண்டியதில்லை. பேஸ்புக்கையும் மூட வேண்டியதில்லை    

குண்டு வெடித்தால் இஸ்லாமியர்கள் மீதாக பார்வை பதிவது வருந்த வேண்டிய விஷயம். அதேநேரம் இப்பிரச்சனை சர்வதேச அளவில் இப்படியாகத்தான் இருக்கிறது. ஏதோ ஒரு மாயவலை அவர்களை அப்படி சிக்க வைத்துவிட்டது. அதில் இருந்து அவர்கள் வெளிவர முடியாமல் தவிக்கிறார்கள் என்பதுதான் உண்மை. எங்காவது குண்டுவெடித்தால் எந்த ஒரு இந்துவும் தனது இஸ்லாமிய நண்பனுக்கு போன் போட்டு நீ தான் வைச்சியா என்று விசாரிப்பதில்லை. விசாரணை நடத்துவது போலீஸ் மற்றும் புலனாய்வுத்துறை. இவ்விசாரணையில் பல சந்தர்பங்களில் இஸ்லாமிய தீவிரவாதிகள் சிக்குவது இஸ்லாமியர்களின் துரதிஷ்டம். இந்த விசயத்தைப் பொறுத்தவரை இந்திய உளவுத்துறை கண்ணை மூடிக்கொண்டு செயல்படுகிறார்கள் என்றெல்லாம் மழுப்ப முடியாது. காரணம் எத்தனையோ இடங்களில் உயரதிகாரிகளாக இஸ்லாமியர்களும் இருக்கிறார்கள். போதாக்குறைக்கு பல சந்தர்பங்களில் எதாவது தீவிரவாத அமைப்பு பொறுப்பேற்றுக் கொள்கிறது. இந்தியாவிலும் பாகிஸ்தானிய தீவிரவாதம் அப்படித்தான் ஊடுருவுகிறது. பாகிஸ்தானிய தீவிரவாதம் அல்லது அயல்நாட்டுத் தீவிரவாதம் என்று அடையாளபடுத்த வேண்டிய விசயங்களை இஸ்லாமிய தீவிரவாதமாக மாற்றியதன் பெரும்பங்கு சோ கால்ட் செக்குலர் மீடியாக்களுக்குதான். எந்த ஒரு தனிப்பட்ட இந்துவுக்கும் அல்ல. பண்டத்தை விற்க வேண்டியது மீடியாக்களின் பொறுப்பு. மார்க்கெட்டிங்.  

அதேநேரம் உள்நாட்டுத் தீவிரவாதத்தில் நாகாலந்த்தில் நடைபெறும் நாகலாந் பார் கிறிஸ்ட் movement மற்றும் NLFT movement இன் தீவிரவாதம் பற்றி எத்தனை பேர் அறிந்திருப்பார்கள். அது மறைக்கப்படவில்லை. அதேநேரம் அது மார்கெட்டிங் பொருளும் இல்லை என்பதை அறிந்துள்ளார்கள் மீடியாக்கள். அரசியல்வாதிகள் மீடியாக்கள் மேல் நீங்கள் வைக்கும் குற்றச்சாட்டு நியாயமானது அதேநேரம் ஒட்டுமொத்த இந்துக்களும் அரசியல்வாதிகள் பேச்சை கேட்டு துவேஷம் வளர்த்துவிட்டார்கள் என நினைப்பதை நான் மறுக்கிறேன்.     

நாஞ்சில் மனோ அவர்களின் பதிவை குறிப்பிட்டதால் அதையும் கூறுகிறேன். நாகர்கோவிலில் பெரும்பான்மை கிறிஸ்தவம். அங்கே அந்த இஸ்லாமிய பெரியவரை ஊரைவிட்டு துரத்தியது இந்து என பொத்தாம்பொதுவாக கூறிவிட முடியாது அவரும் அப்படிக் கூறவில்லை. இந்துவும் கிறிஸ்தவமும் சொக்காரர்கள். அதனால் இந்தமதம்தான் விரட்டியது என கூறமுடியாது. இதை கூற காரணம் உங்கள் பதிவின் முந்தைய பத்தியை படித்துவிட்டு இங்கு வந்தால் அப்படிதான் நினைக்க தோணும். மேலும் வாப்பாக்களும் தாத்தாக்களும் பேரன்களை ஒன்றாக விளையாட பழக்கி இருந்தார்கள் என்று கூறுகிறீர்கள், நாஞ்சில் மனோ கூறுகிறார் வாப்பா ஊரைவிட்டு ஓட காரணமே இந்தக் கிழடுங்க இப்படி கோணகிழி பண்ணிட்டு இருக்கானுக என்பது தான். கிழடுகள் சமூக மூடநம்பிக்கையில் திளைத்தால், இளசுகள் சமூக வலைதள மூடநம்பிக்கையில்...  

அருவா கலாச்சாரம் ஹரியில் விளைந்ததா சீவேலப்பேரி பாண்டியில் விளைந்ததா? இல்லை சாதி கலவரங்களில் விளைந்ததா? ஒட்டுமொத்த தின்னவேலி பயலுவளும் பாசம் வச்சா அல்வா பகைய வளத்தா அருவான்னு தான ஸ்டேட்ஸ் போட்டு திரியறான். இதில் யாரை தப்பு சொல்ல. ஸ்லீப்பர் செல் முருகதாஸ் கூறித்தான் தெரியும், ஆனால் அது சம்மந்தமாக களப்பணி ஆற்றாமல் பொத்தாம் பொதுவாக கூறியிருப்பாரா? தப்பு நடந்த இடத்தில் இருப்பவன் அத்தனை பேரும் போலீஸ் கண்ணுக்கு குற்றவாளியாய் தான் தெரிவான் என்றால் சிலரை சில மாயவலை மேலும் சந்தேகப்பட வைக்கிறது?அந்த மாயவலைகளை கண்டுகொள்ளாமல் விடுவதே அதில் சிக்காமல் இருப்பதற்கு நிகர்.  

இஸ்லாமியரை தீவிரவாதியாக பார்க்கும் அத்தனை பேரையும் சாடுங்கள் உங்களோடு சேர்ந்து கொடிபிடிக்கிறேன், ஆனால் அப்படிப் பார்க்கும் அனைவரும் இந்துக்கள் என்று கூற முனைவது வருத்தமாய் இருக்கிறது. அப்படி நீங்கள் நினைத்தால் நான் மற்றும் என்னைப் போல் பலர் நீங்கள் நினைக்கும் பக்கத்தில் இல்லை என்று கூறவே விழைகிறேன். காரணம் மோசமான அரசியல்வாதிகளின் இந்து ஒருங்கிணைப்பு என்பது விழலுக்கு இரைத்த நீர். விழலைப் பிடுங்குங்கள் பயிரை அல்ல. 

Tweet