ஐம்பதாவது பதிவு : ஹாய் கங்ராட்ஸ்

வரலாற்றுச்சுவடுகள்  

"லவ்வர்ஸ டே ஸ்பெஷல் கதை எழுதச் சொல்லி இருகாங்க தல, நம்ம கம்பெனி வெப் சைட் பாத்தீங்களா" மதிய உணவு முடித்து அரக்க பறக்க ஓடி வந்த விக்ரம் மூச்சுவிடக் கூட மறந்து என்னிடம் கூறிய வார்த்தைகள் தான் இவை.

"அத ஏண்டா இவ்ளோ ஆர்வமா சொல்ற, நடத்துனா நடத்திட்டு போகட்டும் "   கூறியது சீனுவாகிய நான்.

"யோவ் தல உங்கள மதிச்சு சொன்னேன் பாருங்க, எதாவது எழுதிக் கொடுயா நாமளும் கலந்துப்போம்"

"ஹா ஹா ஹா " ... மீண்டும் நான் 

"சிரிக்காதீங்க தல, நா சீரியஸா பேசிட்டு இருக்கேன், நமக்கு பரிசு எல்லாம் கிடைக்கும். நல்ல விஷயம் நடந்தா வேணாம்னா இருக்கு" , விக்ரம்.

" சரி எதபத்தி, என்ன எழுதலாம்னு சொல்லு ட்ரை பண்ணிப் பாப்போம்"

"ஹீரோ நடுவெயில்ல ஒரு பொண்ண பாக்குறான். உடம்பெல்லாம் வேர்வை யோட நிக்குற ஹீரோவ ஹீரோயின் பாக்குறா, பொண்ணும் பையன பார்த்த உடன இம்ப்ரெஸ் ஆகுறா, முதல் பார்வையில லவ்வு, ஆனா ரெண்டு பெரும் லவ்வ சொல்லிக்கக் கூடாது " கதையின் கருவை அத்தனை ஆர்வமாய் சொல்லிக் கொண்டிருந்தான் விக்ரம்.

இந்த சம்பவத்தை இந்த இடத்தில ஸ்கிப்பிவிட்டு வேறு சில முக்கியமான விசயங்களைப் பற்றி பேசுவோம்.

மின்னல்வரிகள் 

அசால்ட்டாக ஐநூறு ஆயிரங்களைக் கடந்து பலரும் தெம்பாக ஓடிக் கொண்டிருக்க, ஐம்பதைத் தொடுவதற்குள்ளாக எனக்கோ மேல்மூச்சு கீழ்மூச்சு வாங்குகிறது. அல்லது அப்படி ஒரு பிரமை கற்பனை மாயை  அல்லது மாயை  அல்லாத உண்மை. பதிவுலக ஜாம்பவான்களை தொன்று தொட்டு எழுதிவரும் மார்கண்டேயன்களைப் பார்க்கும் பொழுது ஐம்பது என்பது அளப்பரிய சாதனையோ அல்லது அலப்பறையைக் கூட்டும் சாதனையோ அல்ல. இருந்தும் என்னைப் பொறுத்த வரையில் மகிழ்ச்சியான ஒரு விஷயம்.

எங்கள்(என்) பிளாக் 

  

சிறுகதைகளை தவிர வேறு எதுவும் எழுதக் கூடாது என்று தான் பதிவுலகினுள் காலடி எடுத்து வைத்தேன். பதிவுலகை நாடி வந்தவர்களின் நாடி பிடித்துப்பார்த்த பொழுது நமது கடையில் சிறுகதைகளை வைத்து மட்டுமே வியாபாரம் செய்துவிட முடியாது என்பதை தெளிவாகப் புரிந்து கொண்டேன். (எனது ஆரம்பகாலப் பதிவுகள் பெரும்பாலும் சிறுகதைகளாக மட்டுமே இருக்கும்).  சிறுகதைகளைத் தவிர்த்து எழுத நினைத்த விஷயம் சினிமா, கேபிள் வழியாக சினிமா சினிமாவைப் பார்க்கும் ஹாலிவூட்ரசிகர்களும் ஹாரிப்பாட்டர்களும் இருக்கும் இந்த இடத்தில் நம் படம் ஓடாது என்பதையும் கணிக்கத் தவறவில்லை. ( நான் எழுதிய சினிமா பதிவுகளுக்கே ஹிட்ஸ் அதிகம் என்பது வேறு விஷயம்!).

ஒரு பதிவன் என்பவன் நிகழ்கால வாழ்க்கையை (அ) தன் எண்ணங்களை பதிந்து பகிருந்து கொடுப்பவனாக இருக்க வேண்டும் என்ற பதிவுலக விதிக்கு ஏற்ப என்னை மாற்றிக் கொண்டேன். அப்படியாக நிகழ்காலத்தைப் பற்றி எழுத வேண்டுமென்ற எண்ணத்தில் எழுதத் தொடங்கிய பதிவுகள் தான் சென்னையைப் பற்றிய பதிவுகள். தென்காசியைப் பற்றி எழுதாமல் சென்னையைப் பற்றி மட்டுமே அதிகம் எழுதுவதாக என் மண்ணின் மைந்தர்கள் என்னை முறைப்பதுண்டு. தென்காசியைப் பற்றி எழுதவும் பேசவும் பல விஷயங்கள் இருந்தும், சென்னையில் நான் தேடித் தேடி அறிந்து கொண்ட விஷயங்கள் அதிகம். அவை நிகழ்கால சென்னைவாசிகளுக்கும் வருங்கால சென்னைவாசிகளுக்கும் நிச்சயம் உதவலாம் (உதவாமலும் போகலாம்)  என்ற எண்ணமே சென்னையைப் பற்றிய எனது பதிவுகளுக்கான மிக முக்கியமான விஷயம்.       

ஸ்பெஷல் மீல்ஸ் - சுஜாதா

வலைபூ ஆரம்பித்தால் அதில் சுஜாதா என்னும் பிள்ளையார் சுழியைத் தான் முதலில் பதிக்க வேண்டும் என்று நினைத்து நினைத்து காலம் கடத்திக் கொண்டே இருந்தேன்.  ஐம்பதாவது பதிவும் வந்துவிட்டது இதுவரை ஒருபதிவு கூட வாத்தியாரைப் பற்றி எழுதவில்லை. எழுத்தறிவித்தவன் வாத்தியார் அவரைப் பற்றிய பதிவு விரைவில் விரைவில் என்று எழுத முடியாமல் விரைவாக காலமும் மற்ற பதிவுகளும் கடந்து கொண்டே உள்ளது. வெகு சமீபத்தில் தான் யவனிகா படித்தேன், அதைப் பற்றியாவது எழுத வேண்டுமென்று நினைத்தேன் முடியவில்லை. ஹாரி புண்ணியத்தில் சுஜாதா சாயலில் கதை எழுதும் வாய்ப்பு கிடைத்தது, அதற்காக ஹாரி அவர்களுக்கு சிறப்பான நன்றிகள்.

தம்பி - தீவிரவாதம் 

சகபதிவர்கள் மிக முக்கியமானவர்கள். இவர்களைப் போல் எழுத வேண்டும் என்பதற்கு எடுத்துக்காட்டாய் பலரும், தயவு செய்து இவர்களைப் போல் மட்டும் எழுதி விடாதே என்பதற்கு எடுத்துக்காட்டாய் சிலரும் மறைமுகமாக பயிற்சி அளித்துக் கொண்டே உள்ளார்கள். சமயங்களில் பதிவுலகில் நடக்கும் வெட்டுக்குத்துக்களும் தீவிரவாதங்களும் ஷப்பா.... இருந்தும் ஒவ்வொருவரும் ஒவ்வொரு விதமான படிப்பினையை கற்றுக் கொடுத்துக் கொண்டேதான் உள்ளார்கள். ஆரோக்கியமான விவாதங்களும் ஆங்காங்கே நடந்து கொண்டு தான் உள்ளது. நான் சொல்ல வரும் விஷயம்,  பதிவுலகம் நேரத்தைக் குடிக்கவில்லை, ஏதோ ஒரு விதத்தில் ஒரு வித்தியாசமான சூழ் நிலையை உருவாகிக் கொடுத்துக் கொண்டே உள்ளது என்பது தான். அதனால் பதிவுலகம் போர் அடித்து விடாது என்பது என் கணிப்பு.

பிட்...பைட்...மெகா பைட்...

எனது பதிவு மூலம் நான் அறிந்து கொண்ட சில பிட்...பைட்...மெகா பைட்கள்...

• அக்கா என்ற வார்த்தையை கூகிள் தப்பார்த்தம் செய்து கொண்டதால் எனது அக்கா கடைக்கு கணிசமான வாடிகையளர்கள் தினமும் தவறாது வந்து ஏமாந்து கொண்டிருக்கிறார்கள்.

• பொன்னியின் செல்வனைப் பற்றி படிப்பவர்கள் மிக அதிகமாகவே உள்ளார்கள். ஒரு நாளில் குறைந்த்தது ஒருவராவது பொன்னியின் செல்வனைத் தேடுகிறார். ஏதோ ஒரு விதத்தில் சென்னையும் ராமேஸ்வரமும் படிக்கப்படுகிறது.

• சினிமா பதிவுகளுக்கு தான் தமிழன் முதலிடம் கொடுக்கிறான் என்பதற்கு உதாரணம் என் சினிமா விமர்சனகள் கூட படிக்கப்படுகின்றன என்பது தான்.  

தலைபோல வருமா

பதிவெழுத ஆரம்பித்த புதிதில் என் எழுத்துக்களை உற்சாகப்படுத்த நண்பன் காளிராஜ் வரைந்து கொடுத்த படம் தான்  தற்போது என் வலைபூவிற்கு அடையாளமாக இருக்கும் புகைப்படம். அவனாக முன்வந்து செய்து கொடுத்தது, தலைப்பிற்கு ஏற்ற வகையில் அந்த படத்தை தயார் செய்து கொடுத்தது, வலைபூவிற்கு அற்புதமான அடையாளம் கிடைக்க அவனும் ஒரு காரணம். மிக்க நன்றி தல. இதுவரை ஒரு முறை கூட இதை பற்றி எங்கும் குறிபிட்டது இல்லை, இங்கே வைப்பு கிடைத்தது கூறிவிட்டேன்.

ஊர்ப்பேச்சு 

தொடர்ந்து உற்சாகமளித்து வரும் அனைவரையும் தனியே குறிப்பிடவில்லை, குறிப்பிட நினைத்தால் உங்கள் ஒவ்வொருவரைப் பற்றியும் தனிப் பதிவு ஒன்றே எழுதலாம், அப்படி எழுத நேரம் கிடைப்பின் தவறவும் மாட்டேன். இந்தப் பதிவு உலகம் மிக முக்கியமான நல்ல நண்பர்களைப் பெற்றுக் கொடுத்துள்ளது.. இதற்குக் காரணம் உங்கள் முகங்கள் இல்லை எழுத்துக்கள் தான்....அந்த எழுத்துக்களுக்கு எனது நன்றி.

கேளுங்க 

ஐம்பது பதிவுகள் எழுதியதற்காக சங்கம் எனக்கு பாராட்டு விழா எதுவும் நடத்துமா ? என்பதை ராசா கேளுங்க மூலம் தலைவரிடம் கேட்கச் சொன்னார், ( தலைவரே உங்கள் மரமண்டையில் ஏறியதா?)  

பிலாசபி 

பொருத்தமான தலைப்புகள் அனைத்தும் சகபதிவர்களிடம் இருந்து சுட்டது, காப்புரிமை கேட்டு சங்கத்துப் படியேறின் நீதி வழங்கப்பட மாட்டாது என்பதை இங்கே பெருமையாகக் கூறிக் கொள்கிறேன். காரணம் இங்கே நீதிகள் விற்கப் படுவதில்லை.

விளம்பரம் 

விளம்பர குறிப்பு : பதிவின் ஆரம்பத்தில் இருக்கும் நீலநிற எழுத்துகளைப் படித்து விட்டு மீண்டும் விளம்பரப் பகுதிக்கு வாருங்கள். 

"நல்ல விஷயம் நடந்தா வேணாம்னா இருக்கு" என்று அன்று விக்ரம் சொல்லிய வார்த்தைகளால் நடந்த ஒரு நல்ல விஷயம் நான் வலைபூ ஆரம்பித்தது ...! (மூணு புள்ளி ஒரு ஆச்சரியக் குறி). என் வலைப்பூவின் முதல் பதிவு அல்லது சிறுகதை அன்று விக்ரம் கொடுத்த கதைக்கரு தான். அந்த முதல் பதிவு மற்றும் நான் எழுதிய முதல் கதை இன்றைய விளம்பரம்.

ஹாய் கங்ராட்ஸ்

Tweet