பதிவர்களுக்கான பரிசுப் போட்டி - அறிவிப்பு

அன்பான பதிவுலகத்திற்கு வணக்கங்கள்,

இதுவரை யாருக்குமே காதல் கடிதம் எழுதியதில்லை, எழுதாத ஒரு காதல் கடிதத்தை கற்பனையாய் எழுதினால் என்ன என்ற ஒரு உணர்வு, ஒரு மாலை வேளையில் என்னுடன் சேர்ந்து கொண்டு என்னைத் துரத்த ஆரம்பித்தது.

என்ன எழுதலாம் என்று யோசித்துக் கொண்டிருக்கும் போதே, பாலர் வகுப்பில் தொடங்கி இதோ இந்தக் கணம் என் முன் தோன்றி ஏதோ ஒருவிதத்தில் என்னுள் ரசாயன மாற்றத்தை ஏற்படுத்துகின்ற அந்த திடீர் பெண் மீது வரும் திடீர்க் காதல் வரை அத்தனை நியாபகங்கள் வந்து செல்கின்றன. 

சரி பள்ளியில் தொடங்கி, திடீரென்று முன் தோன்றும் அந்த அழகு தேவதைகள் வரை ஒவ்வொருவருக்காய் அடுக்கடுக்காய் கற்பனைக் கடிதங்கள் எழுதலாம் என்ற சிந்தனைக்கு வந்தேன். நான் மட்டுமே எழுதினால் கொஞ்சம் போர் அடிக்கும், துணைக்கு பதிவுலக நண்பர்களையும் சேர்த்துக் கொண்டு தொடர் பதிவாய் எழுத ஆரம்பித்துவிடலாம் என்ற அளவில் அந்தக் காதல் கடித எண்ணம் சற்றே உரு ஏறியிருந்தது.

இந்தக் காதல் கடிதம் எழுதும் எண்ணம் இன்னும் மெருகேற ஏன் இதையே ஒரு போட்டியாக வைக்கக் கூடாது என்ற விபரீத ஆசை எழுந்ததன் விளைவு இப்பதிவு.

முடிவுசெய்ததுமே ஸ்கூல் பையனுக்கு தொலைபேசினேன் காரணம் சில நாட்களுக்கு முன் இந்த விசயத்தைப் பற்றி இவரிடம் தான் பேச ஆரம்பித்திருந்தேன். அவரும் உற்சாகபடுத்த உடனடியாக களத்தில் குதித்துவிட்டேன்.

நடுவர்களாக பங்கெடுக்க வாத்தியார் பாலகணேஷ், எங்கள் பிளாக் ஸ்ரீராம் சார் மற்றும் மூன்றாம் சுழி அப்பாதுரை சாரை தொடர்பு கொண்ட பொழுது எவ்வித எதிர்ப்பும் தெரிவிக்காமல் மூவருமே முழு மனதுடன் மிக சந்தோசமாக சம்மதித்தார்கள். அதுவே எனக்கு மிகப்பெரிய ஆறுதல்.

சில பதிவர்கள் தற்போது பதிவெழுதுவதையே குறைத்துவிட்டனர். இன்னும் சிலர் அனுபவம், சினிமா பயணக்கட்டுரைகள் என்று எழுதுபவர்கள். அதனால் தொடர் பதிவு எழுதுவதில் அவர்களை அழைக்க எனக்கு தயக்கம் இருந்தது.

தற்போது போட்டியாக அறிவிப்பதால் எனக்கு எந்த தயக்கமும் இல்லை. உங்கள் அனைவரையும் கலந்து கொள்ள அன்போடு அழைக்கிறேன். இது எனது முதல் முயற்சி, உறுதுணையாய் இருந்து உற்சாகப்படுத்தவும், உற்சாகத்துடன் கலந்து கொள்ளவும் அன்புடன் கேட்டுக் கொள்கிறேன்.    

போட்டிக்கான தலைப்பு :

1. உங்கள் காதலன் அல்லது காதலிக்கு   நீங்கள் எழுத நினைத்த காதல் கடிதம். 

2. உங்கள் காதலன் அல்லது காதலிக்கு   நீங்கள் எழுத மறந்த காதல் கடிதம். 

3. உங்கள் காதலன் அல்லது காதலிக்கு   நீங்கள் எழுதிய காதல் கடிதம். 

நடுவர்கள்: 

ரஞ்சனி நாராயணன் 

மின்னல்வரிகள் பாலகணேஷ்  

எங்கள் பிளாக் ஸ்ரீராம்  

மூன்றாம் சுழி அப்பாதுரை  

விதிமுறைகள் : 

1. கற்பனையோ / உண்மையோ நீங்கள் எழுத வேண்டியது ஒரு காதல் கடிதம். 

2. முழுக்க முழுக்க கவிதையாய் இருக்கக் கூடாது ஆனால் கவிதையும் கலந்து இருக்கலாம்.

3. காப்பி பேஸ்ட்டாக இருக்கக் கூடாது. முடிந்த அளவிற்கு சொந்த கவிதைகளை மேற்கோளாக எழுதுங்கள்.  

4.  500 வார்த்தைகளுக்குக் குறையாமல் இருக்க வேண்டும். அதிகபட்சம் 1200 வார்த்தைகள்.

செய்ய வேண்டியது : 

1. நீங்கள் கலந்து கொள்ள தயாரா என்பதை பின்னூட்டத்தில் தெரிவித்து அதனுடன் உங்களை தொடர்புகொள்ள வேண்டிய மின்னஞ்சல் முகவரியையும் கொடுத்துவிட்டு செல்லுங்கள். 

2.நீங்கள் எழுதிய காதல் கடிதத்தை உங்கள் பதிவில் வெளியிட்டு bsrinivasanmca@gmail.com என்ற எனது முகவரிக்கு அந்த பதிவின் லிங்க்கை அனுப்புங்கள்.

கலந்து கொள்வதற்கான இறுதி தேதி ஜூலை இருபது.

ஆகஸ்து 10க்குள்  பரிசு பெற்றவர்கள் பற்றிய விபரம் அறிவிக்கப்படும்.

பரிசு பற்றிய விபரம் 

முதல் பரிசு            - 500 ரூபாய் 

இரண்டாம் பரிசு   - 300 ரூபாய் 

மூன்றாம் பரிசு     - 200 ரூபாய் 

மற்றும் மூன்று ஆறுதல் பரிசுகள் தலா 150 ரூபாய். 

முதல் மூன்று பரிசு பெற்றவர்களது காதல் கடிதங்கள் திடங்கொண்டு போராடுவில் வெளியிடப்படும்.

பதிவர்கள் அல்லாதவர்களுக்காக :   

பதிவர்கள் அல்லாதவர்கள் பங்கு கொள்ள நினைத்தால் அவர்களும் தாராளமாய் பங்கு கொள்ளலாம். அவர்கள் செய்ய வேண்டியது, தங்களுடைய படைப்பினை எனது bsrinivasanmca@gmail.com என்ற மின்னஞ்சலுக்கு தங்களது சிறுகுறிப்புடன் அனுப்பினால் அந்த படைப்புகள் திடங்கொண்டு போராடுவில் இடம் பெறும். மற்றும் நடுவர்களின் கவனத்திற்கு கொண்டு செல்லப்படும். அதனால் நீங்களும் தாராளமாய் இப்போட்டியில் பங்கு கொள்ளலாம்.   

இது தவிர வேறு ஏதேனும் உங்களுக்கு சந்தேகம் இருப்பின் பின்னூட்டத்தில் தெரியப்படுத்துங்கள்.

இது எனக்கான முதல் அனுபவம் அதனால் இப்போட்டியில் வேறு ஏதேனும் முக்கிய குறிப்பு விடுப்பட்டது போல் உணர்ந்தீர்கள் என்றால் அதையும் தெரியப்படுத்துங்கள். 

உங்கள் நண்பர்கள் அனைவரிடமும் இப்போட்டி குறித்த தகவலை சென்று சேருங்கள். 

நீங்கள் கலந்து கொள்ள தயாரா என்பதை பின்னூட்டத்தில் தெரிவித்து அதனுடன் உங்களை தொடர்புகொள்ள வேண்டிய மின்னஞ்சல் முகவரியையும் கொடுத்துவிட்டு செல்லுங்கள்.  

இந்தப் பதிவின் தலைப்பை நீங்கள் பார்த்த நொடியில் இருந்தே கவுண்ட்டவுன்ஆரம்பித்து விட்டது, உடனே எழுதத் தொடங்குகள் நீங்கள் எழுத நினைத்த/மறந்த அல்லது எழுதிய காதல் கடிதத்தை.      

Tweet