"பதில்" வினவு தளம் - நம்மால் நமக்காக நாமே

அனைவருக்கும் இனிமையான வணக்கங்கள். சம்பளம் கொடுக்கும் முதலாளி இந்த மாதம் வேலையும் கொஞ்சம் அதிகம் கொடுத்துவிட்டதால் வலையுலகம் பக்கம் வருவதற்கு சிறிது தாமதம் ஏற்பட்டுவிட்டது. என்றும் தொடர்ந்து உற்சாகமாக இயங்கும் வலையுலகிற்கு மீண்டும் ஒருமுறை உற்சாகமான வணக்கம் வைத்துவிட்டு பதிவிற்குள் நுழைகிறேன் உங்களோடு...

பிரபல பதிவர் பிளாக்கர்நண்பன் அப்துல் பாசித்தும் அவரைப் போலவே பிரபல பதிவரான கற்போம் பிரபு கிருஷ்ணாவும் இணைத்து தொடங்கியுள்ள புதிய தளம் "பதில்". பதில் என்னும் தளத்தின் பெயரே அதற்கான பதிலை தெளிவாக சொல்லிவிடுகிறது, இருந்தும் இந்தப் பதிவை நீட்டி முழக்க வேண்டிய கட்டாயத்திற்கு என்னை நானே தள்ளிக் கொண்டதால் இந்தத் தளத்தினைப் பற்றி கொஞ்சம் விரிவாக பின்வரும் வரிகளில்.

சுஜாதவின் ஏன் எதற்கு எப்படி, மதனின் ஹாய் மதன்ஸ் கேள்விகளில் இடம் பெரும் கேள்விகளில் இருந்தே தமிழனின் ஞானத்(!) தேடலை நாம் வியக்கலாம். இது வரை நாம் கேள்விபட்டிராத வார்த்தைகளையெல்லாம் கோர்த்து கேள்வியாகக் கேட்பார்கள், சுஜாதாவும் மதனும் அவற்றிக்கான விடையை எங்கிருந்தாவது தேடிக் கண்டுபிடித்துக் கொடுத்துவிவார்கள். சமீபத்தில் என்னைக் கவர்ந்த ஒரு ட்வீட் "விக்கிபீடியா இல்லாத நாட்களில் தமிழகத்தின் விக்கிபீடியாவாக இருந்தவர் சுஜாதா". 

நிச்சயமாக உலகம் முழுவதுமே கேள்விகளாலும் பதில்களாலும், பதில் தேடுவதற்கான பதில் கேள்விகளாலுமே நிரம்பியுள்ளது. கேள்வி கேட்பவன் ஞானம் பெறுகிறான், பதில் கொடுப்பவன் ஞானத்தை விருத்தி செய்கிறான் என்ற பழமொழியை நிச்சயம் ஏதோ ஒரு நாட்டில் யாரோ ஒரு மகான் சொல்லி இருப்பார். அதனால் கேள்வி பதில் என்பது நம் வாழ்வு சார்ந்தது, வாழ்தலுக்கான தேடல் சார்ந்தது. இன்றைய இணைய உலகத்தில் கேள்விகளை விட பதிலே நிரம்வி வழிகின்றன இருந்தும் அவை அனைத்தும் தமிழில் கிடைக்கப் பெறுகின்றனவா என்பது தான் முக்கியம். 

                                       

இணையவெளியில் தொழில்நுட்பம் சார்ந்த நமது சந்தேகங்களைத் தீர்க்க உதவும் விதமாக பாசித்தும் பிரபுவும் இணைத்து தொடங்கியுள்ள தளம் "பதில்". உங்களுக்கு ஏற்படும் சந்தேகங்களைக் கேள்வியாக்கலாம், மற்றவர்களின் கேள்விகளுக்கு பதில் அளிக்கலாம். சுருக்கமாக லிங்கன் வார்த்தைகளில் சொல்ல வேண்டும் என்றால் நம்மால் நமக்காக நம்மைக் கொண்டு நடத்தப்படும் ஒரு தளம் தான் கேள்வி "பதில்" தளம். கணினி இணையம் மொபைல் ப்ளாக் இவை சார்ந்த கேள்விகளும் இத்துறை சார்ந்த வேலைவாய்ப்பு பற்றியும் உங்கள் கேள்விகளையும் பதிலையும் தரலாம்.

இத்தனை பெரிய தமிழ் இணைய வெளியில் நிச்சயம் பல்லாயிரக்கனக்கான தமிழர்களுக்கு பலவிதமான தொழிநுட்பத்தில் சிறந்த புரிதலும் அனுபவமும் இருக்கும் அவர்களின் வழிகாட்டுதல்கள் தேவைப்படுபவர்களுக்கு தேவையான நேரத்தில் சென்று சேரலாம். அந்தப் பல்லாயிரக் கணக்கானவர்களில் நீங்களும் ஒருவராக இருக்கலாம், யாரோ ஒரு நண்பரின் கேள்விக்கு பதில் தரலாம், அதனால் இப்படி ஒரு தளம் திறந்த இரு நண்பர்களுக்கும் இந்த முயற்சிக்கும் முதலில் வாழ்த்துக்கள்.

                                           
தமிழில் குழுமம் என்றும் ஆங்கிலத்தில் forum என்றும் சொல்லுவார்கள். இங்கு நடைபெறுவது முழுவதும்கேள்வி பதிகலாகவும் விவாதங்களாகவும் இருக்கும். சம காலத்தில் பேஸ்புக் ட்விட்டர் கூட விவாதகளங்கள் தான் ஆனால் அவற்றை முழுமையான கேள்வி பதில் தளங்களாகக் கருத முடியாது, காரணம் இவற்றில் முறையான கோர்ப்பு கிடையாது, மற்றும் இவை பொழுதுபோக்கு சார்ந்தவை. மேலும் கேள்வி கேட்டு பதில் அளிப்பது ஒன்றும் புதிய முயற்சி இல்லை காலம் காலமாக இணையம் அறிந்த ஒன்று தான், இதனை நான் மறுக்கவில்லை, ஆங்கிலத்தில் தொழில் நுட்பம் சார்ந்த விவாத களங்களும் கேள்வி பதில் தளங்களும் அதிகம், ஆனால் தமிழில் தொழிநுட்பம் சார்ந்த விவாத களம் இதுவரை யாராலும் முறையாக நடத்தப் படவில்லை என்பதே உண்மை. அந்தக் குறையை போக்கும் விதமாக இரு இளைஞர்கள் வழிநடத்துகிறார்கள் என்றால் அவர்களை நாம் ஊக்குவிப்பதில் தவறு இல்லை. நேரம் கிடைக்கும் போதெல்லாம் பதில் தளத்திற்கு செல்லுங்கள் உங்கள பங்களிப்பை அளியுங்கள். 

                          

பதில் தளத்தில் உங்களுக்கு என்று ஒரு கணக்கு தொடங்குகள், வாருங்கள் பயணத்தில் இணைவோம். சில நாட்களுக்கு முன் ஹாரியின் வலைப்பூவில் எங்கள்பிளாக் ஸ்ரீராம் சார் நினைவுபடுத்திய பாரதியின் இந்த வரிகள் நியாபகம் வருகிறது "சென்றிடுவீர் எட்டுத்திக்கும் கலைச் செல்வங்கள் யாவும் கொணர்ந்து இங்கு சேர்ப்பீர்". எட்டுத்திக்கில் இருக்கும் கேள்விகளுக்கும் கலைச் செல்வமாக பதில் தளம் மாற எனது வாழ்த்துக்கள் மற்றும் பங்களிப்புகள். 

"தமிழில் இது புது முயற்சி இல்லை என்றாலும் சிறந்த முயற்சியாக கொண்டு செல்ல நினைக்கிறோம்" என்ற பிளாக்கர் நண்பனின் வார்த்தைகளை நான் வழிமொழிகிறேன். 

பதில் தள முகவரி : www.bathil.com

பதில் தளத்தின் வலைபூ : www.blog.bathil.com

பதில் பேஸ்புக் பக்கம் : https://www.facebook.com/bathilgal

விளம்பரம் 

காமெடிகும்மி என்னும் வலைப்பூவில் சீனு என்னும் பெயரில் எழுதும் ஒரு பதிவரின் அமானுஷ்ய தொடர் படிக்கத் தவறாதீர்கள்.  

காமெடி கும்மியும் பட்டிகாட்டான் ஜெய்யும் - 1

Tweet