பொன்னியின் செல்வன் புதினம் என்னும் புதுமை

பாஞ்சாலி சபதத்தால் ஒரு பாரதம், கைகேயி சாபத்தால் ஒரு ராமாயணம் என்று இந்தியாவின் இரு பெரும் காவியங்களுக்கு காரணகர்த்தா பெண்கள். இதை குறிபிடுவதன் காரணம் பெண்கள் எவ்வளவு வலிமையான சக்தி! அவர்கள் வாக்கின் வலிமை, எவ்வளவு நேர்மறை விளைவுகளை உருவாக்கும். அதே நேரத்தில் எத்தகைய எதிர்மறையான விளைவுகளை உண்டாக்கும் என்பதை உணர இக்காவியங்கள் ஒரு சிறிய உதாரணம், சிலப்பதிகாரமும் மணிமேகலையும் கூட பெண்களின் பெருமை கூறும் தமிழ்க் காப்பியங்கள். 

பெண்கள் பெருமை கூறும் காவியங்கள் இத்தனை இருக்க இவை எதுவுமே சமகாலத்தில் எழுதப்பட்டது இல்லை, இதனை மனத்தில் வைத்துத் தானோ என்னவோ கல்கி அவர்கள் பொன்னியின் செல்வன் என்னும் அருமையான படைப்பை எழுதி இருக்கிறார். கிட்டத்தட்ட இரண்டாயிரம் பக்கங்கள் கொண்ட மின் புத்தகம், ஐந்து பாகங்கள். ஒரு பக்கத்திலோ இல்லை ஒரு பாகத்திலோ கூட சலிப்பு தட்டாத எழுத்து வேகம். அத்தகைய படைப்பைப் படித்தது மிகப் பெரிய விசயமாகவே கருதுகிறேன். பதினான்கு நாட்கள் இரவு பகலாக படித்தேன்,  இரவு பகலாக படித்ததற்குக் காரணம் அதில் இருந்த சுவாரசியமும், அடுத்து என்ன நடக்கும் என்று சிந்திக்கக் கூட அவகாசம் இல்லாமல் தன் அபார எழுத்துக்களால் கட்டிபோட்டு இழுத்துச் சென்ற கல்கி அவர்களின் எழுத்துத் திறமையும் தானே அன்றி வேறெதுவுமில்லை. 

கல்கி அவர்கள் தஞ்சையில் பிறந்ததாலோ என்னவோ அவரது வரலாற்றுப் புதினங்கள் அனைத்தும் தஞ்சையைச் சுற்றி அமைந்த சோழ சாம்ராஜ்யத்தையும் பல்லவ சாம்ராஜ்யதையுமே சுற்றி நடக்கும். சோழவள நாட்டின் பெருமைகளையும் பசுமையையும் அத்தனை அழகாய் படம் பிடித்துக் காட்டியிருப்பார். இதை படிக்கும்பொழுது பாண்டிய நாட்டில் இருந்து வந்த நான் நினைப்பது, யாரோ ஒருவர் சொல்லிய வார்த்தைகளைத் தான்,

சேர சோழ பாண்டியர்கள் தனித் தனியே 

பாதி உலகத்தை ஆண்டார்கள்,

இமயத்தில் கொடியையும் நட்டார்கள், 

மூவேந்தர்களும் ஒன்றாய் இணைத்திருந்தால் 

உலகையே ஆண்டிருக்கலாம் காரணம்   

தமிழன் அத்தனை 

வலிமையானவன் வளமையானவன்.  

இனி பொன்னியின் செல்வனை நோக்கி பயணிப்போம். 

சோழ நாட்டிற்கு, சிற்றரசர்களாலும் எதிரி நாடுகளான சேர பாண்டிய ஈழ நாடுகளில் இருந்தும் ஆபத்து வருகிறது. பேரரசன் விஜயாலய சோழர்  வயோதிகம் காரணமாய் படுத்தபடுக்கை ஆகிவிட்டார் மேலும் சிற்றரசர் ஒருவரால் மறைமுகமாக சிறை பிடித்து வைக்கப்பட்டிருக்கிறார். அவர் பெற்ற பிள்ளைகள் ஒவ்வொருவரும் ஒவ்வொரு இடத்திலும் ஒவ்வொரு காரணங்கள் நிமித்தம் இருக்கிறார்கள். மூத்த மகன் ஆதித்த கரிகாலன் தந்தை வந்து வாழ்வதற்காக பொன்மாளிகையை கட்டிக்கொண்டு காத்திருக்கிறான், தன் ஒரே மகள் குந்தவை பழையாறை என்னும் இடத்தில் வசித்து ராஜாங்க காரியங்களைப் பார்த்து வருகிறாள், இளைய மகன் அருள்மொழிவர்மர் பாண்டிய மணிகிரீடம் ஒளித்து வைக்கபட்டிருக்கும் ஈழ நாட்டின் மீதான போர் தொடுப்பில் இருக்கிறார். இங்கிருந்து தான் கதை தொடங்குகிறது.

சுந்தர சோழர் மற்றும் அவரது பிள்ளைகளின் உயிருக்கும், சோழ நாட்டிற்கும் பாண்டிய நாட்டு ஆபத்து உதவிகளால் ஆபத்து வருகிறது. இந்த ஆபத்துகளை எப்படி எதிர் கொள்கிறார்கள், தங்கள் உயிரைக் காத்து நாட்டையும் எவ்விதம் காப்பாற்றப் போகிறார்கள் என்பதை வரலாற்றுப் புதினமாக சொல்கிறார் கல்கி கிருஷ்ண மூர்த்தி அவர்கள். இக்கதையிலே பல பெண்கள் இடம் பெற்றாலும் இடம் பெரும் அனைவரும் முக்கியத்துவம் பெற்றாலும் இரு பெண்கள் மட்டும் தனித்துவம் பெறுகிறார்கள். அவர்கள் சோழர் குலமகள் குந்தவை மற்றும் குலநாசம் செய்யத் துடிக்கும் நந்தினி.

பெண்கள் நினைத்தால் நல்லதும் நடக்கும் நாசமும் விளையும் என்பதை இவ்விருவர் மூலம் எடுத்துச் சொல்லும் விதம் அற்புதமாக இருக்கும். மதியை மயக்கி காமத்தை பொழியும் கண்களுடன், சந்திக்கும் ஆண்கள் அனைவரையும் தன் வலையில் விழச் செய்யும் பெண்ணாக நந்தினியையும், மதியை விழிப்புறச் செய்து அன்பும் பண்பும் நிறைந்த, ராஜ காரியங்களில் முடிவெடுக்கும் தைரியமான பெண்ணாக குந்தவையையும் படைத்திருப்பார். நிற்க இக்கதையில் இடம் பெரும் எவையுமே கற்பனைக் கதாப்பாத்திரம் கிடையாது. வரலாற்று நிகழ்வினுள் தன் கற்பனையைப் புகுத்தி இவ்வாறு நடந்திருக்கலாம் என்று சொல்லுவார், ஆங்காங்கே அவர் கூறும் வரலாற்று நிகழ்வுகளுக்கான ஆதாரங்களையும் கூறிச்செல்வார். உதாரணத்திற்கு இன்னார் இன்னாரை மனம் புரிந்தார் என்பதையும், இன்னாருக்கு இவ்வளவு சொத்துக்கள் இருந்தது அதை இவ்விதங்களில் செலவு செய்ததற்கான செப்பேடுகள் கிடைத்துள்ளது என்பதையும் ஆதாரமாகக் கூறுவார். வரலாற்றின் நம்பகத்தன்மையையும் அதிகரிக்கச் செய்வார்.  

பொன்னிநதியில் ஓடத்தில் செல்லும்பொழுது தவறி நதியினுள் விழுந்துவிடும் குழந்தை அருள்மொழிவர்மனை திடிரென்று தோன்றி மறைந்த ஒரு பெண்மணி காப்பாற்றிக் கொடுத்ததால் அவருக்கு பொன்னியின் செல்வன் என்ற பெயர், இந்தப்  பொன்னியின் செல்வனே பிற்காலத்தில் முதலாம் ராஜராஜசோழனாக மாறியவர் என்பது வரலாறு சொல்லும் உண்மை. 

அரசாங்கம் எப்படி நடைபெற்றிருக்கும் அதில் யாரெல்லாம் முக்கிய பொறுப்புகள் வகித்திருப்பார்கள் போன்ற பல விசயங்களை நுணுக்கமாக ஆராய்ந்து எழுதி இருப்பார், அரசன் என்பவன் எப்படி செயல் பட வேண்டும், அவன் கீழ் பணியாற்றுபவர்களை எப்படி எல்லாம் கையாள வேண்டும் என்பதை தன் கற்பனை மூலம் மெருகேற்றி இருப்பார். முதல் அமைச்சராக வரும் அநிருத்த பிரம்மராயரும் அவரின் ஒற்றனாக வரும் திருமலை நம்பியும் அரசாங்கத்தின் தூண்களாக இருப்பார்கள். ஒரு ஒற்றன் அரசாங்கத்திற்கு எவ்வளவு முக்கியமானவன் என்பதையும் அவன் எவ்விதம் விவேகத்தோடு செயல்பட வேண்டும் என்பதையும் திருமலை நம்பி மூலம் சொல்லியிருப்பார். 

கோபத்தில் முடிவெடுக்கும் நண்பனான பல்லவன் பார்த்திபேந்திரனும், மூடத்தனத்தால் முடிவேக்கும் கந்தமாறனும் நந்தினியின் காமவலையில் விழுந்தபின் கதையின் போக்கையும் வேகத்தையும் பல மடங்கு மாற்றியிருப்பார்கள் . ஆராயாமல் செய்யும் காரியம் கெடுதலில் முடியும் என்பதை இவர்கள் மூலம் அறியலாம். பலபக்கங்களில் இருந்து வரும் நெருக்கடிகளைக் கண்டு சோழப் பேரரசர் எப்படி கலங்குகிறார், முடிவெடுக்கத் தெரியாமல் திணறுகிறார். இந்த நெருக்கடி காலச் சூழ்நிலையை அவர் மகள் குந்தவையும் முதலமைச்சர் பிரம்மராயரும் கையாளுகிறார்கள் என்பதைப் படிக்கவே பிரம்மிபாய் இருக்கும். பார்த்துப் பார்த்து செதுகியிருப்பார் பொன்னியின் செல்வனை.

ஒவ்வொரு  கதாப்பாத்திரத்திற்கும் உயிர் கொடுத்திருப்பார் சரியான விகிதத்தில் உணர்ச்சி கொடுத்திருப்பார், நம்மையும் உணரச் செய்திருப்பார். கிட்டத்தட்ட மூன்றரை ஆண்டுகள் (1950-1954) வரையில் எழுதிய தொடர்கதையை பல பதிப்புகள் கண்டு சாதனை படைத்த புதினம் என்னும் புதுமையை விமர்சனம் என்னும் வார்த்தைக்குள் அடக்கிவிட முடியாது. நான் கூறியதை கதையின் கரு என்று வேண்டுமானால் கொள்ளலாம். கதைச் சுருக்கமோ கதையையோ எல்லாம் நான் சொல்லவில்லை, பாதி பேர் படித்திருப்பீர்கள், படிக்காத மீதிபேர் படித்துவிடுங்கள். படிக்காவிட்டால் படித்து விடுங்கள், படித்திருந்தால் பெருமை கொள்ளுங்கள் அறுபுதமான புத்தகம் ஒன்றை படித்ததற்காக.

      

முக்கியமான ஒருவரை நான் விட்டுவிட்டேன் அல்லவா? , பொன்னியின் செல்வனைப் படித்தவர்களோ அல்லது அதனைப் பற்றி அறிந்தவர்களோ நான் வேண்டுமென்றே செய்த பிழையைக் கண்டு பிடித்திருக்கலாம். ராஜாங்கத்திற்கு ஆபத்து வந்திருக்கிறது காப்பாற்றி ஆக வேண்டாமா ?, கதைக்கு நாயகன் வேண்டாமா ?. ஆம் நான் கூற மறுத்தது கதையின் நாயகனைப் பற்றித் தான்.

என்னைக் கவர்ந்த கதையின் நாயகனை, சோழ சாம்ராஜ்யத்தைக் காப்பாற்ற பெரிதும் பாடுபட்ட  வாணர் குலத்து வீரனை, அரசரர் புதல்வர்களின் நண்பனை, எல்லோரரயும் தன் வலையில் விழச் செய்த நந்தினியையே தன் வலையில் விழச் செய்த உள்ளம் கவர் கள்வனை, சுஜாதாவின் கணேஷ் - வசந்த் பாத்திரம் போல் என் மனம் கவர்ந்த வந்தியத்தேவனைப் பற்றி ஒரு பதிவில் ஓரிருவரிகளில் சொல்லிவிட்டால் அவன் எப்படி என்னை மன்னிப்பான். காத்திருங்கள் அவனுகென்று ஒரு பதிவு அதுவே அடுத்த பதிவு.  

Tweet